علی گڑھ: اے ایم یو طلبا کا پُرامن احتجاج، یونیورسٹی کھولنے کا مطالبہ

علی گڑھ مسلم یونیورسٹی کے طلبا گزشتہ تین روز سے یونیورسٹی کھولنے کے پیش نظر مولانا آزاد لائبریری کے سامنے  پُرامن احتجاج کی شکل میں پڑھائی کررہے ہیں۔

علی گڑھ مسلم یونیورسٹی (اے ایم یو) کے طلبا گزشتہ تین روز سے مولانا آزاد لائبریری کے سامنے پُرامن احتجاج کی شکل میں پڑھائی کررہے ہیں۔ انہوں نے وائس چانسلر کے نام ایک میمورنڈم بھی دیا ہے جس کے ذریعے یونیورسٹی کھولنے کا مطالبہ کیا ہے۔

اطلاعات کے مطابق علی گڑھ مسلم یونیورسٹی کورونا وبا کی پہلی لہر سے قبل شہریت ترمیمی قانون کے خلاف احتجاج کے دوران یعنی 15 دسمبر 2019 سے ہی بند ہے۔ تقریبا دو برس سے یونیورسٹی کے طلبا آن لائن کلاسز اور امتحانات دے رہے ہیں۔ اور اب وہ بے صبری سے انتظار کر رہے ہیں کہ جلد از جلد یونیورسٹی کھلے اور ان کو آف لائن کلاسز کے ساتھ لائبریری سیمینار، لیب، اور شعبہ میں تعلیم حاصل کرنے کا موقع ملے، جیسے وہ 2019 سے قبل کیا کرتے تھے۔

اے ایم یو طلبا کا پرامن احتجاج، یونیورسٹی کھولنے کا مطالبہ

کورونا وبا کے سبب ملک کے سبھی تعلیمی ادارے کو ابھی بھی مکمل طور پر نہیں کھولا گیا ہے، حالانکہ بازار، سیاسی ریلیاں، کاروبار، اسکول، سیاحت، نقل و حمل وغیرہ کو حکومت نے کھول دیا ہے، لیکن تعلیمی ادارے اب بھی بند ہیں۔ جس کی وجہ سے یونیورسٹی کے طلبا اپنی تعلیم کو لے کر پریشان ہیں۔ اور یونیورسٹی انتظایہ سے یونیورسٹی کو کھولنے کا مسلسل مطالبہ کررہے ہیں۔

اے ایم یو طلبا کا پرامن احتجاج، یونیورسٹی کھولنے کا مطالبہ

اس سلسلے میں علی گڑھ مسلم یونیورسٹی کے طلبا کا کہنا ہے کہ آن لائن کلاسز اور امتحانات میں ہم وہ سبھی ورک پورا نہیں کر پارہے ہیں۔ جو آف لائن کیا کرتے تھے اور کرنا ضروری ہے، جیسے پریکٹیکل، کیمیکل ری ایکشن، سروے وغیرہ۔ وہیں لائبریری، سیمینار ہال بند ہونے سے طلبا کو کتابیں فراہم نہیں ہوپارہی ہے، جس سے ان کے مشکلات میں شدید اضافہ ہوا ہے۔

اس تمام مشکلات کے پیش نظر یونیورسٹی طلبہ گزشتہ تین روز سے مولانا آزاد لائبریری کے سامنے پڑھائی کی شکل میں پرامن طریقے سے احتجاج کر رہے ہیں اور انتظامیہ سے مطالبہ کر رہے ہیں کہ وہ جلد از جلد مولانا آزاد لائبریری سمینار، شعبہ، انٹرنیٹ اور یونیورسٹی کو طلبا کے لیے کھولیں۔

اس دوران طلبا نے یہ بھی بتایا کہ انہوں نے وائس چانسلر پروفیسر طارق منصور کے نام ایک میمورنڈم بھی دیا ہے جس کے ذریعے انہوں نے یونیورسٹی، لائبریری، سیمنار، وائی فائی اور دیگر چیزیں کھولنے کا مطالبہ کیا ہے۔