کورونا وبا کی دوسری لہر کے دوران بڑھتے خطرات کے مدنظر جواہر لال نہرو میڈیکل کالج کی او پی ڈی خدمات کو بند کر دیا گیا تھا۔ جس سے نہ صرف علی گڑھ بلکہ قرب و جوار کے گاؤں، دیہاتوں اور اضلاع سے آنے والے مریضوں کو خاصی پریشانیوں کا سامنا کرنا پڑرہا تھا۔ تاہم اب ان تمام مریضوں کے لیے خوشی کی خبر یہ ہے کہ تمام مریضوں کے لئے یونیورسٹی انتظامیہ او پی ڈی خدمات کو 16 جولائی سے دوبارہ شروع کرنے جارہا ہے۔
واضح رہے کہ کووڈ وبا کی روک تھام کے سلسلے میں حکومت کے رہنما اصولوں کے مطابق میڈیکل کالج میں سبھی او پی ڈی خدمات کو معطل کرتے ہوئے صحت عملہ کو کووڈ 19 کے بندوبست پر مامور کردیا گیا تھا۔ اس دوران جواہر لال نہرو میڈیکل کالج کے ڈاکٹرز اپنے تمام مریضوں کو ٹیلیفون پر کنسلٹنسی فراہم کررہے تھے۔ مرکزی حکومت کی جانب سے مرحلہ وار پابندیوں کو ختم کرنے کی اجازت دینے کے بعد اب او پی ڈی شروع ہورہی ہے۔
مزید پڑھیں :اے ایم یو کے جواہر لال نہرو میڈیکل کالج میں نئے آکسیجن پلانٹ کا افتتاح
میڈیکل سپرنٹنڈنٹ دفتر سے شائع نوٹس کے مطابق کل 19 او پی ڈی کو کھولنے کا فیصلہ کیا گیا ہے جس کے لیے رجسٹریشن صبح آٹھ بجے سے ساڑھے نو بجے تک ہی ہوں گے۔ او پی ڈی کے مطابق مریضوں کی تعداد بھی مقرر کردی گئی ہے جو 30 سے لے کے 70 تک ہے۔ او پی ڈی میں آنے والے مریضوں کو ماسک، سینیٹائزر اور سماجی دوری کا خاص دھیان رکھنا ہوگا۔
