ریاست اترپردیش کے ضلع امروہہ کے کوتوالی علاقے کے محلہ شیوا دورا کے رہائشی مبین سلمانی کے بیٹے خورشید کی شادی 27 جنوری کو امروہہ دیہی علاقے کے ایک گاؤں میں ہوئی تھی۔ شادی کے 24 گھنٹے بعد دولہا خورشید اچانک کہیں لاپتہ ہوگیا ، جس کے بعد نوجوان کے اہل خانہ کا روتے روتے برا حال ہے۔
اس پورے معاملہ کی جانکاری دیتے ہوئے نوجوان کے والد مبین نے بتایا کہ اس کا بیٹا 27 جنوری کے بعد 29 جنوری کی رات اچانک لاپتہ گیا، جس کا ابھی تک پتہ نہیں چل سکا ہے۔
نوجوان بیٹے کی یاد میں ماں اور شوہر کی یاد میں نئی دلہن کا برا حال ہو چکا ہے لیکن ابھی تک نوجوان کا کوئی سراغ نہیں لگ سکا ہے۔
دلہن انعم نے بتایا کہ اس کا شوہر رات کو کسی بات کو لیکر پریشان تھا، جس کے بعد وہ کمرے سے باہر نکلا تو واپس نہیں آیا۔
اب اس پورے معاملے میں پولیس نے لاپتہ ہونے کا مقدمہ درج کرلیا ہے اور مسلسل اس نوجوان کی تلاش جاری ہے لیکن دو دن گزرنے کے باوجود بھی اس نوجوان کا کوئی سراغ نہیں لگ سکا ہے۔
اس پورے معاملے میں امروہہ ضلع کے ایڈیشنل سپرنٹنڈنٹ پولیس اجے پرتاپ سنگھ کا کہنا ہے کہ لاپتہ فرد کا معاملہ درج کرلیا گیا ہے اور پولیس ٹیمیں زیر تفتیش ہیں، نوجوان کے بازیاب ہونے کے بعد سارا معاملہ سامنے آجائے گا۔
