ریاست اترپردیش کے ضلع امروہہ کے صنعتی قصبے گجرولا میں ایک دوا ساز کمپنی سے دیر رات اچانک سے دھواں اٹھا جس کی وجہ سے لوگوں کو سانس لینے میں دشواری پیش آئی۔
جب کچھ لوگ گھروں سے باہر آئے تو انہیں بھی عجیب قسم کی بدبو کا احساس ہوا اور کچھ ہی دیر میں کمپنی کے آس پاس ہجوم اکٹھا ہوگیا۔
اطلاع ملتے ہی فائر بریگیڈ عملہ کمپنی کے گیٹ پر پہنچا لیکن انہیں کافی دیر تک کمپنی میں داخل ہونے سے روکے رکھا۔
یہ دھواں کمپنی کے ایک یونٹ سے نکل رہا تھا۔ مقامی لوگوں نے بتایا کہ یہ دھواں اسکریپ جلنے کی وجہ سے پھیلا تھا جبکہ کچھ لوگ گیس لیکیج کی بات کر رہے تھے۔
اس معاملے میں جب سی ایف او، کے ورما کمپنی کے گیٹ پر پہنچے تو سکیورٹی گارڈ نے اُنہیں اندر جانے سے روک دیا تاہم سی ایف او نے سکیورٹی گارڈ سے سخت انداز میں بات کی تو گیٹ کھولا گیا۔
جب سی ایف او نے کمپنی سے دھواں نکلنے اور شہر میں پھیلنے کی بابت معلومات حاصل کرنے کی کوشش کی تو کمپنی کا کوئی بھی ملازم صحیح بات بتانے کو تیار نہیں ہوا۔
اس پورے معاملے میں سی ایف او، کے ورما نے بتایا کہ کمپنی کے عہدیداروں سے بات کی جارہی ہے لیکن دھواں اور بدبو کی وجہ کا ابھی پتہ نہیں چل سکا ہے اور اس کی وجوہات کی چھان بین کی جائے گی۔
