اترپردیش کے متعدد اضلاع میں ڈینگو سے بچوں کی ہورہی اموات کے پیش نظر بارہ بنکی کے ضلع مجسٹریٹ نے ایک پریس کانفرنس منعقد کی جس میں انہوں نے دعویٰ کیا کہ ضلع میں ڈینگو سے تحفظ کے لیے تمام تیاریاں مکمل ہیں۔ اس کے لیے خصوصی کنٹرول روم بنایا گیا ہے۔' ساتھ ہی انہوں نے عوام کو ڈینگو سے تحفظ کے لئے بیدار بھی کیا۔
واضح رہے کہ مشرقی اترپردیش میں گزشتہ کئی روز سے ڈینگو کا قہر جاری ہے جس سے بڑی تعداد میں بچوں کی اموات ہو چکی ہیں۔ اسی کے پیش نظر حکومت کی ہدایت پر بارہ بنکی کے ضلع مجسٹریٹ ڈاکٹر آدرش سنگھ نے پریس کانفرنس کرکے وبا کی روک تھام کےلیے کی جارہی تیاریوں سے متعلق بتایا۔
انہوں نے بتایا کہ 'بارہ بنکی پہلے سے ڈینگو اور دماغی بخار کے معاملے میں حساس رہا ہے اس لیے ممکنہ خترے کے پیش نظر تمام تیاریاں مکمل کر لی گئی ہیں۔ ان کے مطابق تمام سی ایچ سی اور پی ایچ سی پر ڈینگو کے لئے مچھردانی سے لیس دو بیڈ تیار ہیں۔ ضلع ہسپتال میں بھی ان بیڈ کے ساتھ جے ای اور اے ای کے لئے قبل کی مانند وارڈ تیار ہیں۔'
ڈاکٹر آدرش سنگھ نے بتایا کہ '7 ستمبر سے ویکٹر بانڈ بیماریوں سے تحفظ کے لئے گاؤں میں گھر گھر جا کر محکمہ صحت کے ملازمین بخار کے مریضوں اور کووڈ-19 کے مریضوں کی تلاش کریں گے۔ یہی نہیں یہ ٹیمیں ٹی بی مریضوں کی تلاش کریں گے اور دیگر ویکسینیشن بھی کرائیں گی۔' ساتھ ہی 45 برس سے اوپر کے ایسے افراد کی تلاش کریں گی جنہوں نے ٹیکا کاری نہیں کرائی ہے۔'
یہ بھی پڑھیں: فیروزآباد میں ڈینگو کا قہر، 100 بیڈ کے نئے ہسپتال کی تعمیر شروع
ضلع مجسٹریٹ ڈاکٹر آدرش سنگھ نے بتایا کہ پہلے سے چل رہا کووڈ-19 کنٹرول روم اب ڈینگو کنٹرول کے طور پر بھی کام کرے گا۔' یہاں 05248، 224849، 222926، 229916 پر کال کر کے کوئی بھی شخص ڈینگو سے متعلق جانکاری حاصل کر سکتا ہے۔' انہوں عوام سے اپیل کی ہے کہ 'ڈینگو سے تحفظ بہت آسان ہے۔ ڈینگو سے تحفظ کے لئے بس گھروں میں کہیں بھی پانی جمع نہ ہونے دیں۔'
