اتر پردیش کے ضلع بارہ بنکی کے رام سنیہی گھاٹ تحصیل کے احاطے میں واقع مسجد کو گزشتہ دنوں مسمار کئے جانے کے معاملے میں جمعہ کے روز بہوجن سماج پارٹی کا ایک وفد بارہ بنکی پہنچا اور مسجد کے تعلق سے وفد نے ضلع کے اے ڈی ایم سندیپ کمار گپتا سے گفتگو کی۔
بی ایس پی کے لیڈر دنیش چندرا کی قیادت میں آئے اس وفد نے اعلیٰ عہدیداروں سے ملاقات کے بعد بتایا کہ 100 سال پرانی مسجد جس میں نماز ہوتی چلی آرہی ہے۔ جس پر کوئی تنازع نہیں ہے، جہاں فرقہ وارانہ ہم آہنگی بھی قائم ہے۔ اس کے باوجود مسجد کو مسمار کر دیا گیا۔ ان تمام سوالوں کا انتظامیہ جواب نہیں دے پا رہی ہے۔
بہوجن سماج پارٹی کا مطالبہ ہے کہ اس معاملے کی اعلیٰ سطحی جانچ کراکر مسجد کو پھر سے تعمیر کرایا جائے، بی ایس پی رہنما طارق قدوائی نے کہا کہ ہمیں عدلیہ پر مکمل اعتماد ہے، پارٹی کے رہنما مبشر علی اس معاملے کو عدالت میں لے گئے ہیں۔
انہوں نے کہا کہ بی ایس پی اس لڑائی کو پر زور طریقے سے اس وقت تک لڑتی رہے گی جب تک انصاف حاصل نہیں ہوجاتا۔
