دیوبند کے کالی پار علاقہ کے ایک گاوں کی خاتون نے اپنے گھر والوں کے ساتھ پولیس اسٹیشن میں تحریری شکایت درج کرائی ہے۔
شکایت میں خاتون نے بتایا کہ وہ اپنے شوہر کے ساتھ گاوں کے ہی ایک کولہو پر مزدوری کرتی ہے۔ الزام ہے کہ بدھ کے روز کولہو مالک کے پاس وہ اپنی اور اپنے شوہر کی مزدوری کے 50 ہزار روپیہ لینے پہنچی تھی۔
تب کولہو مالک اس کے ساتھ گالی گلوچ کرنے لگا، جب اس نے اس حرکت کی مخالفت کی تو ملزم اسے کھینچ کر کمرہ میں لے گیا اور خاتون کو یرغمال بناکر اس کی جنسی زیادتی کرنے کی کوشش کی۔
الزام ہے کہ جب خاتون نے اس کی مخالفت کی تو کولہو مالک نے اس کے ساتھ مارپیٹ کرکے اسے زخمی کردیا۔بعد میں شور مچانے پر وہاں پہنچے لوگوں کو دیکھ کر کولہو مالک اسے جان سے مارنے کی دھمکی دیتے ہوئے وہاں سے فرار ہوگیا۔
خاتون نے پولیس سے ملزم کے خلاف کارروائی کرنے کی مانگ کی ہے۔ وہیں پولیس کا کہنا ہے کہ تحریر درج کرلی گئی ہے، جانچ کے بعد قانونی کارروائی کی جائے گی۔
