نوئیڈا میں آج صبح ہوئے پولیس انکاونٹر میں ایک بدمعاش زخمی ہوگیا جبکہ دوسرا بدمعاش پاس کی جھاڑیوں میں چھپ گیا تھا جسے کومبنگ آپریشن کے دوران پولیس نے گرفتار کرلیا۔ انکاونٹر کے بعد پولیس نے زخمی بدمعاش کو قریب کے ہسپتال منتقل کیا۔ ابتدائی تحقیقات میں پتہ چلا کہ دونوں بدمعاش لوٹ مار اور چین اسنیچنگ کے تقریباً ایک درجن مقدمات میں ملوث ہیں۔
پولیس نے بدمعاشوں کے قبضہ سے ایک ٹی وی ایس اسکوٹی، ایک پستول، دو کارتوس اور 3 موبائل فون ضبط کیے ہیں۔ اے ڈی سی پی رن وجے سنگھ نے بتایا کہ پولیس چیکنگ کے دوران اسکوٹی پر سوار دو مشتبہ افراد کو روکا گیا لیکن پولیس کو دیکھ کر وہ فرار ہونے کی کوشش میں تھے۔ بعد ازاں پولیس ٹیم نے ان کا تعاقب کیا اور سیکٹر 54 کے سٹی فاریسٹ کے قریب ان کا محاصرہ کر لیا۔
انہوں نے بتایا کہ بدمعاشوں نے پولیس پر فائرنگ کر دی جس کے بعد جوابی فائرنگ میں ریشبھ دیال کے پیر پر گولی لگی اور وہ زخمی ہوگیا۔ اے ڈی سی پی کے مطابق رشبھ دیال کا تعلق اتر پردیش کے ضلع قنوج سے ہے اور وہ دہلی۔این سی آر میں طویل عرصہ سے چین اور موبائیل اسنیچنگ کے واقعات میں ملوث ہے۔
