ریاستی انتخابی دفتر سے آج ملنے والی اطلاع کے مطابق پرچہ نامزدگی داخل کرنے کے چوتھے دن ضلع مئو کی گھوسی سیٹ سے کمیونسٹ پارٹی آف انڈیا کے امیدوار شیخ حسیم الدین نے پرچہ نامزدگی داخل کیا۔
اس کے علاوہ لکھنؤ کینٹ سیٹ سے کانگریس کے امیدوار ڈی پی سنگھ اور بہوجن سماج پارٹی (بی ایس پی) کے ارون ترویدی نے پرچہ نامزدگی داخل کیا ہے۔ پرتاپ گڑھ سے آل انڈیا مجلس اتحاد المسلمین (اے ایم آئی ایم) کے ایثار احمد نے اپنا پرچہ نامزدگی داخل کیا تھا۔
ضلع کانپور کی گووندنگر سیٹ سے بی ایس پی کے امیدوار دیوی پرساد تیواری اور جسٹس پارٹی سے انیتا دیوی نے پرچہ نامزدگی داخل کیا جبکہ ضلع بارہ بنکی کے زیدپور(محفوظ)سیٹ سے کانگریس کے تنوج پنیا اور ناگرک ایکتا پارٹی کے ہری نندن سنگھ نے پرچہ نامزدگی داخل کیا۔
علی گڑھ سےراشٹریہ سوشلسٹ سماج پارٹی کے ہریش کمار نے پرچہ نامزدگی داخل کیا۔ ابھی تک کل 11 پرچہ نامزدگی داخل کیے جا چکے ہیں۔
غورطلب ہے کہ پرچہ نامزدگی 30ستمبر تک داخل کیے جائیں گے اور یکم اکتوبر کو کاغذات کی توثیق ہوگی۔ نام واپس لینے کی آخری تاریخ تین اکتوبر ہے۔ ضمنی الیکشن 21اکتوبر کو ہوگا اور ووٹوں کی گنتی 24 اکتوبر کو ہوگی اور اسی دن نتائج کا اعلان کیا جائے گا۔
ریاست کی 11اسمبلی سیٹوں رام پور۔ اگلاس، پرتاپ گڑھ، لکھنؤ کینٹ، جلال پور،گنگوہ،مانک پور، بلہا، زید پور،گووندنگر اور گھوسی سیٹ پر ضمنی الیکشن ہورہا ہے۔
