ضلع ادھم پور کے علاقہ کلر ہمتی کے لوگوں نے آج محکمہ انیمل ہسبنڈری دفتر کے باہر اپنے مطالبات کے تعلق سے احتجاج کیا اور محکمہ کے خلاف نعرے بازی بھی کی۔
مظاہرین کی رہنمائی کرنے والے مقامی نوجوان ساحل منہاس نے کہا کہ ان کے گھر کے قریب ہی محکمہ انیمل ہسبنڈری کی جانب سے جانوروں کا علاج کیا جاتا ہے اور کچھ جانوروں کو محکمے میں ہی رکھا گیا ہے۔
محکمہ کے ذریعہ ملحقہ علاقے میں مویشیوں کا گوبر پھینک دیا جاتا ہے جس کی وجہ سے چاروں طرف بدبو پھیل رہی ہے۔
انہوں نے کہا کہ ایک طرف ملک کے وزیراعظم ترجیحی بنیادوں پر صفائی مہم کو عملی جامہ پہنانے کے لیے پروگراموں کا اہتمام کررہے ہیں تو دوسری طرف محکمہ کے ذریعہ گائے کے گوبر اور دوسری گندگی کو پورے علاقے میں پھینک دیا جارہا ہے جس کی وجہ سے کورونا کے ساتھ ہی دیگر وبا پھیلنے کا خدشہ ہے۔
انہوں نے کہا کہ اس ضمن میں محکمہ کو متعدد بار آگاہ کیا گیا تھا لیکن آج تک کوئی کاروائی نہیں ہو سکی ہے جس کی وجہ سے لوگ آج احتجاج پر مجبور ہوگئے۔
انہوں نے محکمہ کے اعلی عہدیداروں اور ضلعی انتظامیہ سے مطالبہ کیا کہ ترجیحی بنیادوں پر محکمہ انیمل ہسبنڈری دفتر کو کسی اور جگہ منتقل کیا جائے تاکہ لوگوں کو راحت مل سکے۔
