محنت و روزگار کے مرکزی وزیر سنتوش گنگوار نے کورونا وائرس کی عالمی وباء کے قہر کا مقابلہ کرنے اور مضبوط تر بننے کے لیے ہر ممکن کوشش کرنے کی سمت میں بھارت کی عہدبندی کا اعادہ کیا ہے۔
مسٹر سنتوش گنگوار نے گزشتہ شام انٹرنیشنل لیبر کانفرنس کے 109 ویں اجلاس میں تحریک ناوابستہ کے وزراء محنت سے خطاب کرتے ہوئے کہا ‘عالمی وباء سے دنیا بھر میں جان و مال کے نقصان، اقتصادی مندی، معاشرے کے تمام طبقات پر منفی اثرات اور خاص طور پر کمزور طبقوں کو زیادہ غیر محفوظ حالت میں دیکھا گیا ہے’۔
انہوں نے کہا ‘طبی نگہداشت کے نظام، سماجی تحفظ اور روزگار کے مواقع پیدا کرنے کے لیے بہتر تعاون کو یقینی بنانے کی ضرورت ہے۔ حکومتوں کو عالمی وباء سے نمٹنے اور پالیسی کی سطح پر ایک موثر رد عمل دینے کی ضرورت ہے، تاکہ کاروباری تسلسل، آمدنی کا تحفظ اور سب سے بڑھ کر سب لوگوں کی فلاح و بہبود کو متوازن کیا جاسکے’۔
مرکزی وزیر محنت نے کہا ‘بھارت نے ٹیکہ کاری کی ایک وسیع مہم چلائی ہے اور اب تک مجموعی طور پر 22 کروڑ سے زیادہ ٹیکے لگائے جاچکے ہیں۔ زندگی اور روزگار میں غیر معمولی تبدیلیاں رونما ہوئی ہیں۔ اس لیےطریقہ کار کے بارے میں نیا نقطہ نظر تیار کیا جانا چاہیے۔ ڈیجیٹل پلیٹ فارم کے استعمال نے چیلنج پیدا کردیے ہیں اور ساتھ ہی مزید مواقع بھی فراہم کیے ہیں۔ بھارت نے مزدوروں کے سماجی تحفظ کے لیے ایک قانونی ڈھانچہ تیار کیا ہے’۔
وزیر موصوف نے کہا کہ روزگار ایک اہم پہلو ہے اور بھارت مختلف اسکیموں اور پروگراموں کے ذریعہ صحت اور اقتصادی محاذوں پر بھی روزگار اور مدد فراہم کرنے کی کوششیں کر رہا ہے۔
