تلنگانہ ہائی کورٹ نے ریاستی حکومت سے وضاحت طلب کی کہ پی پی ای کٹس اور دیگر حفاظتی اشیاء کے باوجود کچھ ڈاکٹرس اور طبی عملہ کورونا وائرس سے کیوں متاثر ہورہا ہے۔؟ عدالت نے حکومت کو حفاظتی کٹس، ماسک، دستانوں کی فراہمی، کورونا وائرس سے متاثرمریضوں کی صحیح تعداد اور کورونا وباء کو ختم کرنے کیلئے کئے جارہے اقدامات پر 8 جون تک تفصیلی رپورٹ طلب کی ہے۔
حکومت کے خلاف عدالت کے احکامات کو نظر انداز کرنے کے الزامات لگاتے ہوئے کیسز پر رد عمل ظاہر کرتے ہوئے ججز نے نکتہ چینی کی ہے کہ کس طرح ڈاکٹرز او رطبی عملہ کورونا سے متاثر پائے گئے ہیں۔
چیف جسٹس راگھویندر سنگھ چوہان او رجسٹس وجے سین پر مشتمل دو رکنی بنچ ریٹائرڈ ڈی ایم ایچ او راجندر او رریٹائرڈ پروفیسر ایل ویشوایشوریا کی جانب سے دائر کردہ عرضیوں کی سماعت کررہے تھے۔ درخواست گذاروں کے وکیل سی ایچ پربھاکر نے بحث کرتے ہوئے کہا کہ عدالت کے احکامات کے باوجود حکومت ڈاکٹر، میڈیکل طلباء اور دیگر پروفیشنلس کو پی پی ای کٹس اور دیگر ضروری اشیاء فراہم کرنے میں ناکام رہی جس کی وجہ سے طبی عملہ کورونا سے متاثر ہوگیا۔
ہائی کورٹ نے حکومت کو 8 جون تک تفصیلی رپورٹ داخل کرنے کی ہدایت دی۔ اس کیس کی سماعت 8 جون تک ملتوی کردی گئی ہے۔
