تلنگانہ کے ضلع عادل آباد میں کورونا وائرس کے بڑھتے واقعات کے سبب تاجروں نے رضاکارانہ طور پر از خود متفقہ فیصلہ سے پیر سے صبح 9 بجے تا شام 5 بجے تک ہی عادل آباد ٹاؤن میں دکانوں کے کھلے رکھنے کا فیصلہ کیا ہے۔حالانکہ حکومت کی جانب سے رات 8 بجے تک دکانیں کھلی رکھنے کی اجازت ہے۔
اس سلسلے میں صدر چیمبر آف کامرس جگدیش اگروال نے صدر ریڈیمیٹ شوروم لکھن چوپڑا خازن چیمبر آف کامرس مہیندر اور کے رویندر کے ہمراہ دفتر چیمبر آف کامرس میں میڈیا سے بات کی۔
صدر چیمبر آف کامرس عادل آباد جگدیش اگروال نے مزید بتایا کہ چیمبر آف کامرس کی جانب سے پیر سے صبح 9 تا شام 5 بجے تک عادل آباد ٹاؤن کی دکانیں کھلی رکھنے کا اعلان کیا ہے۔
انہوں نے شہریوں سے اپیل کی ہے کہ ضرورت کے تحت ہی ماسک کا استعمال کرتے ہوئے احتیاطی تدابیر کے ساتھ خریداری کریں۔اور شام 5 بجے کے بعد مہلک وائرس سے اپنے آپ کو محفوظ رکھنے کیلئے گھروں تک ہی محدود رکھیں۔
مہلک وائرس کے پھیلاؤ کو روکنے کا واحد حل یہی ہے کہ اپنے آپکو گھروں تک محدود رکھتے ہوئے احتیاطی تدابیر پر سختی کے ساتھ عمل کیا جائے۔انہوں نے ضلع کلکٹر اے دیواسینا اور محکمہ پولیس سے وائرس کے پھیلاؤ کو روکنے کیلئے شہر میں بہتر انتظامات و اقدامات کرنے پر اظہار تشکر کیا۔
