ٹی آر ایس کا مرکز کے خلاف 12 نومبر کو ریاست گیر دھرنا

حکمران جماعت ٹی آرایس کا کہنا ہے کہ مرکز نے اس سے دھان نہ خریدنے کی بات کہی ہے جبکہ ریاستی بی جے پی کے لیڈروں نے کہا کہ ایسا کچھ بھی نہیں ہوا ہے۔

دھان کی خریداری کے مسئلہ پر مرکز کے موقف کے خلاف اس ماہ کی 12 تاریخ کو تلنگانہ کی حکمران جماعت ٹی آرایس ریاست گیر سطح پر دھرنے منعقد کرے گی۔

برسراقتدارجماعت ان دھرنوں کو کامیاب بنانے پرتوجہ مرکوز کیے ہوئے ہے۔ ریاست کے تمام اسمبلی حلقوں میں دھرنے دینے کی پارٹی کیڈر کو ہدایت دی گئی ہے۔ دھان کی خریداری کے مسئلہ پر پچھلے کچھ دنوں سے مرکزی اور ریاستی حکومت کے درمیان تنازع چل رہا ہے۔

حکمران جماعت ٹی آرایس کا کہنا ہے کہ مرکز نے اس سے دھان نہ خریدنے کی بات کہی ہے جبکہ ریاستی بی جے پی کے لیڈروں نے کہا کہ ایسا کچھ بھی نہیں ہوا ہے۔

صدر ریاستی بی جے پی بنڈی سنجے کے اس خصوص میں لگائے گئے الزمات کی مذمت کرتے ہوئے وزیراعلی کے چندرشیکھرراو نے ایک پریس کانفرنس منعقد کی اور مرکز کے رویہ پر برہمی کا اظہار بھی کیا۔انہوں نے الزام لگایا تھا کہ دھان کی خریداری کی ذمہ داری سے مرکزی حکومت بچنا چاہتی ہے۔مرکزی حکومت کے رویہ کے خلاف دھان کی خریداری کے مطالبہ کے ساتھ ریاست کے تمام حلقوں میں ٹی آرایس کی طرف سے دھرنے دیئے جائیں گے۔اس اپیل کے پیش نظر وزیربلدی نظم ونسق و ٹی آرایس کے کارگذارصدر تارک راماراو نے جائزہ لیتے ہوئے پارٹی کیڈر کو اہم مشورے دیئے۔

یواین آئی