مہلک وبأ کورونا وائرس کا خطرہ ہونے کے باوجود تلناگانہ وقف بورڈ کے ملازمین اپنی جان خطرے میں ڈال کر ملازمت انجام دے رہے ہیں۔
وقف بورڈ کی عمارت جس میں چار اقلیتی دفاتر کام کرتے ہیں لیکن آج تک اس عمارت میں سینیٹائزیشن کا کام انجام نہیں دیا گیا تھا اور اس تعلق سے حفاظتی اقدامات کے بارے میں بھی کوئی واضح تفصیل سامنے آئی ہے۔
تفصیلات کے مطابق وقف بورڈ کے اسٹیبلشمنٹ سیکشن کا ایک ملازم گزشتہ چند دنوں سے بیمار تھا۔ کورونا وائرس کے خدشے کے سبب جب اس ملازم کی طبی جانچ کروائی گئی تو اس کی ٹیسٹ رپورٹ پازیٹیو آئی جس کے بعد سے وقف بورڈ کے دفتر میں کام کرنے والے تمام افراد سکتے میں آگئے۔
بورڈ کے ملازم کی کورونا سے متاثر ہونے کی خبر سامنے آنے کے بعد بورڈ کے صفائی عملے کو دفتر میں سینیٹائزیشن کرتے دیکھا گیا۔ کورونا وائرس وبأ پھیلنے کے بعد سے یہاں پہلی بار اس عمارت میں سینیٹائزیشن کا کام انجام دیا گیا۔
ملازم کے کورونا سے متاثر ہونے کی اطلاع کے بعد ملازمین میں خوف کی لہر دوڑ گئی لیکن وہ اس سلسلے میں کچھ بھی کہنے سے گریز کر رہے ہیں۔
ان کا کہنا ہے کہ عمارت میں نہ ہی احتیاطی تدابیر اختیار کی جارہی ہیں نہ ہی ملازمین کو کٹس یا ہینڈ سینیٹائزر فراہم کیا گیا لیکن اگر وہ اس سلسلے کچھ بولیں تو ان کی ملازمت خطرے میں پڑنے کا خدشہ ہے۔
وقف بورڈ میں یہ پہلا معاملہ ہے دیکھنا ہوگا کہ بورڈ کے اعلی عہدیداران ملازمین کے تحفظ کے لیے کیا اقدامات کرتے ہیں؟
