تلنگانہ میں انٹرمیڈیٹ کے پرچوں کی جانچ اور دسویں جماعت کے امتحانات کے سلسلہ میں وزیر تعلیم نے اعلیٰ عہدیداروں کے ساتھ جائزہ اجلاس منعقد کیا جس میں تمام امور پرغور و خوص کیا گیا۔
اجلاس کے بعد میڈیائی نمائندوں سے بات کرتے ہوئے سبیتا اندرا ریڈی نے بتایا کہ کابینہ کے فیصلہ کے مطابق دسویں جماعت کے ماباقی امتحانات مئی کے اواخر تک منعقد کرنے کے اقدامات کئے جارہے ہیں۔
انہوں نے کہا کہ اس سلسلہ میں ریاستی ہائیکورٹ سے رجوع ہوتے ہوئے دسویں جماعت کے امتحانات منعقد کرنے کی اجازت لی جارہی ہے۔
قبل ازیں ہائیکورٹ نے کورونا وائرس کے پھیلاؤں کے مدنظر ایس ایس سی امتحانات پر روک لگادی تھی جبکہ حکومت ماباقی امتحانات منعقد کرانے کےلیے اجازت حاصل کررہی ہے۔
وزیرتعلیم نے کہا کہ انٹرمیڈیٹ کے پرچوں کی جانچ کا کام 12 می سے شروع ہوگا جبکہ پرچوں کی کوڈنگ کا عمل شروع ہوچکا ہے اور اس بار پرچوں کی جانچ 33 سنٹرس پر کی جائے گی۔
انہوں نے آئندہ تعلیمی سال میں خانگی اسکولز کو زائد فیس وصول نہ کرنے کی ہدایت دی۔ حکومت کی خلاف ورزی کرنے والے اسکولز کے خلاف کاروائی کی جائے گی اور ان کی مسلمہ حیثیت ختم کردی جائے گی۔
