آر ٹی سی مزدور یونین اور جے اے سی قائدین کے اجلاس میں آج یہ اہم فیصلہ لیا گیا۔
اس سلسلہ میں اشوتھاما ریڈی نے ایک پریس نوٹ جاری کرتے ہوئے کہا کہ اگر حکومت ملازمین کو رجوع بکار ہونے کی ہدایت دیتی ہے تو ہڑتال ختم کردی جائے گی۔
مکتوب میں کہا گیا کہ آر ٹی سی ملازمین کو ہڑتال سے قبل کی طرح ملازمت پر واپس لیا جائے اور ان کے ساتھ ناروا سلوک سے گریز کیا جائے۔
کنوینر آر ٹی سی جے اے سی اشوتھاما ریڈی نے ہائی کورٹ کی جانب سے اس مسئلے کو لیبر کورٹ کو سونپنے کا خیر مقدم کرتے ہوئے اطمنان کا اظہار کیا اور توقع ظاہر کی کہ ملازمین کو ضرور انصاف ملے گا۔
واضح ہو کہ آر ٹی سی ملازمین کارپوریشن کو نجی کئے جانے کی مخالفت کرتے ہوئے اسے حکومت میں ضم کرنے کا کا مطالبہ کرتے ہوئے 5 اکتوبر سے احتجاج پر تھے۔
چیف منسٹر کے چندرا شیکھر راؤ نے بیک وقت 48 ہزار سے زائد ملازمین کی برطرفی کا اعلان کیا تھا جس پر برہم ملازمین نے ہائی کورٹ کا دروازہ کھٹکھٹایا تھا۔ ہائی کورٹ نے اس معاملے کو آپسی مذاکرات کے ذریعے سلجھا لینے کی ہدایت دی جو بے سود ثابت ہوئی۔ بعد از آں طویل سماعت کے بعد ہائی کورٹ نے مقدمہ کو لیبر کورٹ کے سپرد کردیا۔
اس دوران ریاست کے مختلف علاقوں میں تقریبا 25 آر ٹی سی ملازمین کی اموات واقع ہوئیں جن میں اکثر کی موت قلب پر حملہ کی وجہ سے ہوئی۔
تاہم جے اے سی نے نرم رویہ اختیار کرتے ہوئے ملازمت پر واپسی کے لیے رضامندی کا اظہار کی ہے۔
اب دیکھنا یہ ہوگا کہ حکومت کا اس سلسلے میں کیا رد عمل آتا ہے۔
