تلنگانہ کے چیف سکریٹری سومیش کمار نے متعلقہ عہدیداروں کو ہدایت دی کہ وہ ریاست کے شدید بارش سے متاثرہ 16 اضلاع میں کسی بھی قسم کے جانی یا پھر مالی نقصان کو روکنے کے لیے جنگی خطوط پر بچاؤ اقدامات کریں۔
کمار نے عادل آباد، کھمم، کریم نگر اور ورنگل کے شدید بارش سے متاثرہ 16 اضلاع کے کلکٹرز، ایس پیز کے ساتھ ٹیلی کانفرنس منعقد کی اور ان اضلاع میں صورتحال کا تفصیلی جائزہ لیا۔
چیف سکریٹری نے کلکٹرز کو ہدایت دی کہ وہ صورتحال پر قریبی نظر رکھیں۔ انہوں نے کہا کہ اضلاع میں کنٹرول رومز کا قیام عمل میں لایا جائے۔ ساتھ ہی نشیبی علاقوں کے عوام کو ضرورت پڑنے پر محفوظ مقامات منتقل کیا جائے۔
تمام محکمہ جات کو چاہئے کہ وہ قریبی تال میل کے ساتھ کام کریں اور اس بات کو یقینی بنائیں کہ آبی ذخائر کے پشتے نہ ٹوٹنے پائیں۔انہوں نے کہا کہ پینے کے پانی، بجلی کی سپلائی اور سینی ٹیشن کو اولین ترجیح دی جائے۔
چیف سکریٹری نے تمام کلکٹرز کو یقین دہانی کروائی کہ حکومت ان کو تمام طرح کی مدد فراہم کرنے کے لئے تیار ہے۔ ان کو مشورہ دیا گیا کہ وہ راہل بوجا اسپیشل چیف سکریٹری ڈیزاسٹر مینجمنٹ کے ساتھ کسی بھی قسم کی مدد کے لئے رابطہ میں رہیں۔
