پرائمری ہیلتھ سنٹر کے لئے زمین کا عطیہ دینے والے ایک کسان کے پیر چھوتے ہوئے تلنگانہ کی حکمران جماعت ٹی آرایس کے رکن اسمبلی نے تمام حاضرین کو حیرت زدہ کردیا۔
محبوب آباد حلقہ کی اسمبلی میں نمائندگی کرنے والے شنکرنائیک نے اس موقع پر کہا کہ عوام کے کام کے سلسلہ میں تعاون کرنے والے کا وہ پیر چھو کر شکریہ ادا کرتے ہیں۔
یہ واقعہ محبوب آباد ضلع کے آمنگل علاقہ میں پیش آیا۔ تفصیلات کے مطابق آمنگل میں پرائمری ہیلتھ سنٹر کی تعمیر کے لئے سدرشن نام کے اس کسان نے اپنی زمین عطیہ کر دی۔ اس کسان نے 30 لاکھ روپئے کی مالیت کی آدھا ایکڑ سے زیادہ زمین دینے پر رضامندی کا اظہار کیا۔ جس کے بعد اس زمین پر سرکاری ہیلتھ سنٹرکے قیام کے لئے رکن اسمبلی نے سنگ بنیاد رکھا۔
تاہم اس تقریب میں شریک تمام افراد اُس وقت حیرت زدہ ہو گئے جب رکن اسمبلی نے اچانک اس کسان کے پیر چھوئے اور اس کا شکریہ ادا کیا۔ رکن اسمبلی نے کسان کی اس پہل کی خوب تعریف کی۔
