وزیراعلی کے چندر شیکھر راؤ کی 67 ویں سالگرہ کے موقع پر قومی رہنماوں اور سماج کے مختلف شعبہ جات سے تعلق رکھنے والی اہم شخصیتوں نے مبارکباد پیش کی اور تلنگانہ ریاست کی ہمہ جہتی ترقی کے بارے میں نیک تمناؤں کا اظہار کیا۔
وزیراعلی نے سالگرہ کا آغاز شجرکاری مہم میں حصہ لیتے ہوئے کیا۔ گرین انڈیا چیلنج کے تحت منعقدہ پروگرام میں ایک گھنٹہ میں ایک کروڑ پودے لگائے گئے اور اس پروگرام میں حصہ لیتے ہوئے کے سی آر نے پرگتی بھون میں پودا لگایا۔
رکن راجیہ سبھا جے سنتوش کمار کی درخواست پر وزیراعلی نے شجرکاری مہم میں حصہ لیا۔ ریاست کے تمام اضلاع میں وزراء اور رہنماوں نے وزیراعلی کی سالگرہ کے موقع پر مختلف پروگراموں میں حصہ لیا۔
حیدرآباد کے علاوہ اضلاع میں خون کے عطیہ کیمپ منعقدکئے گئے اور غریبوں میں اشیائے ضروریہ اور غذا کی تقسیم عمل میں آئی۔ مریضوں میں پھل تقسیم کئے گئے۔
وزیر انفارمیشن ٹکنالوجی کے ٹی راما راؤ نے سب سے پہلے اپنے والد کو سالگرہ کی مبارکباد پیش کی۔ ملک بھر سے جن شخصیتوں نے وزیراعلی کو سالگرہ کی مبارکباد پیش کرتے ہوئے پیامات روانہ کئے ، ان میں نائب صدر جمہوریہ ، وینکیا نائیڈو ، وزیراعظم نریندر مودی ، وزیر داخلہ امیت شاہ ، ڈی ایم کے سربراہ اسٹالن، بھوپیش بگھیل ، پریم سنگھ تمنگ، ہیمنت سورین ، گورنر ہماچل پردیش بنڈارو دتاتریہ نے فون پر کے سی آر کو سالگرہ کی مبارکباد دی۔
انہوں نے وزیراعلی کی درازی عمر اور صحت کیلئے نیک تمناؤں کا اظہار کیا۔
