چین بھارت تصادم میں ویرگتی پانے والے تلنگانہ کے سپوت کرنل سنتوش بابو کے اہل خانہ سے وزیر اعلی کے چندرا شیکھر راو نے ان کی رہائش گاہ پہنچ کر ملاقات کی۔
وزیراعلی نے افراد خاندان کو ہمت دیتے ہوئے کہا کہ کرنل کی موت پر انھیں بے حد تکلیف ہوئی مگر کرنل کی قربانی ناقابل فراموش ہے اور وہ ایک بہادر کی طرح دنیا سے گئے ہیں۔اس سے قبل کے سی آر نے کرنل سنتوش کی تصویر پر پھول چڑھائے اور خراج عقیدت پیش کیا۔
وزیر اعلی کے سی آر نے پانچ کروڑ روپئے کا چیک کرنل کی اہلیہ سنتوشی کے حوالے کیا اور مزید انھیں گروپ ون پوزیشن کی ملازمت کی تقرری کا لیٹر بھی دیا۔
اس کے علاوہ حیدرآباد کے بنجارہ ہلز میں 711 گز اراضی کے کاغذات بھی فراہم کیے۔
وزیر اعلی نے کرنل کی اہلیہ اور والدین کو تیقن دیا کہ مستقبل میں کسی بھی چیز کی ضرورت ہو تو وہ بلا کسی جھجک ان سے رابطہ کریں۔ اس موقع پر وزیر جگدیش ریڈی اور دیگر رہنما بھی موجود تھے۔
