غریبوں کو ڈبل بیڈ روم مکانات فراہم کرنے کے لیے تلنگانہ حکومت کی باوقار اسکیم کے تحت تعمیر کردہ مکانات کا افتتاح وزیر افزائش مویشیاں سرینواس یادو نے کیا۔
اس موقع پر خطاب کرتے ہوئے وزیر موصوف نے کہا کہ قبل ازیں اس علاقہ کے عوام کو بارش کی وجہ سے کافی مشکل صورتحال کا سامنا کرنا پڑتا تھا تاہم اب نئے مکانات تعمیر کئے گئے ہیں۔ غریبوں کو وقار کے ساتھ زندگی گزارنے کو یقینی بنانے کے لئے یہ مکانات تعمیر کئے گئے ہیں۔
انہوں نے کہا کہ غریبوں کے لئے ڈبل بیڈ روم مکانات کا نظریہ وزیراعلیٰ کے چندر شیکھر راؤ نے پیش کیا تھا۔ انہوں نے کہا کہ اس علاقہ میں بنائی گئی ہاؤزنگ سوسائٹی میں 85 لاکھ روپے کے خرچ سے یہ مکانات تعمیر کئے گئے ہیں اور ان کو غریبوں کے حوالے کیا گیا ہے۔
انہوں نے کہا کہ اس سوسائٹی میں لفٹ، سی سی روڈس، سیوریج لائن اور پانی کے ذخیرہ کے لئے سمپ کی سہولت بھی فراہم کی گئی ہے۔
یہ بھی پڑھیں: تلنگانہ کے وزیراعلیٰ نے قینچی کی عدم دستیابی میں رِبن پھینک دیا
انہوں نے کہا کہ مکانات کی تعمیر شفاف انداز میں کی گئی ہے اور استفادہ کنندگان کا انتخاب قرعہ اندازی کے ذریعہ کیا گیا۔
(یو این آئی)
