متولی و مینجنگ کمیٹی زمرہ میں مولانا سید اکبر نظام الدین حسینی اور ابوالفتح سید بندگی قادری منتخب ہوئے جبکہ بار کونسل زمرہ میں قرعہ اندازی کے ذریعہ ذاکر حسین کو وقف بورڈ کا رکن منتخب کیا گیا۔ Telangana Waqf Board Managing Committee
دونوں زمرہ کے لیے حج ہاؤس میں رائے دہی ہوئی اور متولی و مینجنگ کمیٹی کے 475 رائے دہندگان میں سے 300 نے حق رائے دہی کا استعمال کیا جس میں سے 36 ووٹ اِن ویلیڈ(مسترد) قرار دیئے گئے۔
اس زمرہ کی دو نشستوں کے لیے جملہ 7 امیدوار میدان میں تھے۔ مولانا اکبر نظام الدین پہلے راونڈ سے ہی سبقت حاصل کرچکے تھے۔ 6 راونڈ کی ترجیحی بنیاد پر رائے شماری میں انہیں جملہ 211 ووٹ حاصل ہوئے جبکہ بندگی بادشاہ قادری 34 ووٹ کے ساتھ دوسرے نمبر پر رہے۔
مولانا اکبر نظام الدین کو پہلے راؤنڈ میں 191 ووٹ ملے اور اس کے بعد ہر راؤنڈ میں ان کی اکثریت میں اضافہ ہوا اور جملہ 211 ووٹ حاصل کرکے وہ ریکارڈ اکثریت سے کامیاب قرار دیئے گئے ۔
الیکشن آفیسر ایل شرمن نے شام 5 بجے ووٹوں کی گنتی کا آغاز کیا اور 6 راؤنڈ کی گنتی کے بعد نتیجہ کا اعلان کیا گیا۔ بار کونسل زمرہ میں ایک نشست کے لیے دو امیدوار تھے ۔
سب لوگوں کی نگاہیں بار کونسل کے رکن پر تھیں جس میں ایم اے کے مقیت اور ذاکر حسین جاوید کو ایک ایک ووٹ حاصل ہوا جس کے بعد الیکشن آفیسر نے قرعہ اندازی کے ذریعہ ایک رکن کا انتخاب کیا۔ قرعہ اندازی میں فیصلہ ذاکر حسین جاوید کے حق میں نکلا۔
واضح رہے کہ وقف بورڈ کے 6 ارکان کا رائے دہی کے ذریعہ انتخاب کیا جاتا ہے اور ارکان مقننہ زمرہ میں فاروق حسین اور کوثر محی الدین بلا مقابلہ منتخب ہوچکے ہیں۔ رکن پارلیمنٹ زمرہ میں اسد اویسی کا بلا مقابلہ انتخاب ہوگا۔
اس طرح وقف بورڈ کے لیے 6 ارکان کے الیکشن کے ذریعہ انتخاب کا مرحلہ مکمل ہوگیا۔ حکومت مختلف زمروں میں پانچ ارکان کو نامزد کرے گی اور جملہ 11 ارکان میں سے کسی ایک رکن کو صدر منتخب کیا جائے گا ۔
