جمعیۃ علماء وقارآباد کے جوائنٹ سکریٹری مولانا محمد عبداللہ اظہر قاسمی نے ضلع میں ایک نابالغ لڑکی کے ساتھ پیش آئے درندگی اور حیوانیت کے شرمناک واقعہ کی شدید مذمت کی۔
انہوں نے اپنے مذمتی بیان میں کہا کہ اس واقعہ نے مہذب سماج کا سر شرم سے جھکادیا۔
واضح رہے کہ ضلع کے موضع بنور منڈل یالال میں ایک 28 سالہ سرینواس نامی درندہ صفت انسان نے ایک 13 سالہ لڑکی کو گھر میں اکیلا پاکر اس کے ساتھ جنسی زیادتی کی۔ پولیس نے اس شخص کے خلاف معاملہ درج کرتے ہوئے اسے فوری گرفتار کرلیا ہے۔
مولانا قاسمی نے کہا کہ جنسی زیادتی کسی بھی مہذب معاشرہ کے لئے ایک کلنک اور بدنما داغ کی حیثیت رکھتی ہے جو کسی بھی صورت میں ناقابل معافی جرم ہے اور ایسے درندہ صفت انسانوں کے ساتھ نرمی اور رحم کا معاملہ اس جرم کو مزید بڑھاوا دینے کے مترادف ہے۔
انہوں نے کہا کہ جمعیۃ علماء ضلع وقارآباد اس درندگی کی سخت الفاظ میں مذمت کرتی ہے اور عدلیہ اور حکومت سے پرزور مطالبہ کرتی ہے کہ ایسی گھناؤنی اور غیر انسانی حرکت کرنے والوں کو عدالت کے وضع کردہ سخت قوانین کے تحت سخت سزا دی جائے جو آئندہ کے لئے ایک سبق اور مثال بن جائے۔ساتھ ہی متاثرہ کو مالی امداد فراہم کی جائے۔
