جنوبی ریاست تلنگانہ کے شہر حیدرآباد میں پولیس کمشنر انجنی کمار نے چھ دسمبر کے پیش نظر پورے شہر میں دفعہ 144 نافذ کردیا ہے۔
پولیس کمشنر کے دفتر سے جاری کردہ مکتوب کے مطابق بلا اجازت کسی بھی قسم کی ریلی، جلسے جلوس، احتجاج، تقاریر، یا بابری مسجد سے متعلق بیینر، پوسٹر تصاویر حتی کہ کسی فرد سے اس بارے میں بات کرنے پر پابندی عائد کردی گئی ہے۔
پولیس کمشنر نے مکتوب کے ذریعہ عوام اور مذہبی تنظیموں کو یہ پیغام دیا کہ چھ دسمبر کے روز امن و امان میں خلل پیدا کرنے والی کسی بھی حرکت سے گریز کریں، اور امن کی برقراری کے لیے پولیس کا تعاون کریں۔
انہوں نے خط میں اس بات کا ذکر کیا کہ چند گروہوں کی جانب سے شہر کے امن وامان کی فضا کو مکدر کرنے کی اطلاعات موصول پو رہی ہیں۔
انجنی کمار نے ان احکامات کی خلاف ورزی کرنے والوں کے خلاف سخت قانونی کاروائی کا انتباہ دیا۔
کمشنر کے احکامات کے مطابق حیدرآباد میں پانچ دسمبر کی شام چھ بجے سے سات دسمبر صبح چھ بجے تک دفعہ 144 کا نفاذ رہے گا۔
