درگاہ یوسفین میں کے سی آر کی صحتیابی کے لیے دعا

تلنگانہ کے وزیراعلیٰ کے چندر شیکھر راؤ بھی کورونا وائرس سے متاثر ہوگئے ہیں اور انہیں ایراولی میں واقع اپنے فارم ہاؤس میں کوارنٹائن کر دیا گیا ہے جہاں ڈاکٹروں کی ایک ٹیم بھی ان کی صحت کی مسلسل نگرانی کر رہی ہے۔ ان کی صحتیابی کے لیے آج درگاہ یوسفینؒ میں دعا کی گئی۔

کے سی آر کی صحتیابی کے لیے حیدرآباد میں واقع درگاہ حضرت یوسفینؒ میں دعا کی گئی اور چادر گل چڑھائی گئی۔ وزیر داخلہ محمد محمود علی، وقف بورڈ کے چیئرمین محمد سلیم اور حج کمیٹی کے چیئرمین محمد مسیح اللہ خان نے درگاہ حضرت یوسفین نامپلی پہنچ کر چادر چڑھائی اور وزیراعلیٰ کے چندر شیکھر راؤ کی جلد صحت و لمبی عمر کے لیے دعا کی۔

گذشتہ روز کے ٹی آر نے ٹویٹ کر کے اپنے والد کے سی آر کی کورونا سے متاثر ہونے سے متعلق اطلاع دی تھی۔ انہوں نے ٹویٹ میں وزیراعلیٰ کی جلد صحت یابی کے لیے دعا کرنے کی اپیل کی تھی۔

تلگودیشم پارٹی کے صدر چندرا بابو نائیڈو، فلم اسٹار و سابق مرکزی وزیر چرنجیوی، بی جے پی صدر بنڈی سنجے و دیگر سیاسی رہنماؤں نے ٹویٹ کر کے، کے چندر شیکھر راؤ کی جلد صحتیابی کے لیے دعا کی۔