تلنگانہ کے نظام آباد ضلع میں بڑھتے ہوئے کورونا کی وباء کے پیش نظر ضلع کلکٹر نارائن ریڈی نے محکمہ صحت کے عہدیداروں کے ساتھ ایک ویڈیو کانفرنس کی اور وباء کے پیش نظر عہدیداروں کو چوکسی اختیار کرنے کی ہدایت دی۔
انہوں نے کہا کہ ضلع میں کورونا وائرس کے معائنے کےلیے لیاب کا بھی قیام عمل میں لایا گیا ہے۔ اور دو تین یوم میں اس کے کام کاج کا آغاز کیا جائیگا۔
لیاب میں معائنے کے بعد اور بھی مثبت کیسز میں اضافہ ہوسکتاہے لہذا ڈاکٹرس کو چوکسی برتنے کی ہدایت دی اور کہا کہ مثبت کیس ظاہر ہونے کی صورت میں پرائمری کنٹاکٹ کی نشاندہی کرتے ہوئے 14 دن تک ہوم کوارنٹائن کرنے کی ہدایت دی جائے اور 14 دن کے بعد نگیٹیو آنے کی صورت میں انہیں باہر جانے کی اجازت دیں۔
کورونا ٹسٹز پرزور دیتےہوئے ضلع کلکٹر سی نارائن ریڈی نے کہا کہ ہر پرائمری ہیلت سنٹر کے علاقوں میں گھر گھر سروے کریں اور وائرس کے بارے میں دریافت کریں۔ آئسولیشن میں رہنے والے افراد پر خصوصی نظر رکھیں اور جو افراد مثبت نہیں ہے انہیں احتیاطی تدابیر اختیار کرنے کی ہدایت دیں۔ کوویڈ سے متعلق کسی قسم کی غلطی نہ ہونے دیں اور ہر روز اپنی تفصیلات سے ضلع انتظامیہ کو واقف کروائیں اور ہر جمعہ کے روز وبائی امراض کے بارے میں خصوصی مہم چلائیں۔
انھوں نے کہا کہ میڈیکل آفیسر دیہاتوں میں سرپنچ ، ایم پی ٹی سی ، مقامی رہنماوں کے اشترا ک سے کام کریں تو بہتر ہوگااور پرائمری ہیلت سنٹر، میونسپلٹی کے علاقہ میں سنیٹائزر کرائیں اور پرائمری ہیلت سنٹروں کیلئے منظور کردہ رقومات کا استعما ل کریں۔
