آل انڈیا مجلس اتحاد المسلمین کے سینئررہنما حیدرآباد سے حلقہ یاقوت پورہ کے رکن اسمبلی احمد پاشا قادری کورونا وائرس سے متاثر ہوئے ہیں۔
بدھ کے روز مذکورہ رہنما کا ایک نجی ہسپتال میں کووڈ ٹیسٹ کیا گیا جس میں ان کی رپورٹ مثبت آئی ہے۔ احمد پاشا قادری کو اعضا شکنی کی شکایت ہے۔ اس کے علاوہ دوسری کوئی علامت ان میں نہیں پائی گئی۔ تاہم ڈاکٹرز نے انھیں 14دن گھریلو قرنطینہ میں رہنے کا مشورہ دیا ہے۔
احمد پاشا قادری ایم آئی ایم کے معتمد عمومی ہیں، مذکورہ رہنما سلطان صلاح الدین اویسی کی رفاقت میں رہ چکے ہیں۔ اپنے حلقے میں لوگوں کے مسائل کو حل کرنے میں ہمیشہ پیش پیش رہتے ہیں۔ قادری زمین پر کام کرنے والے رہنما کے طور پر جانے جاتے ہیں۔
