حیدرآباد: ریاست تلنگانہ کے وزیر خزانہ ہریش راؤ نے کہا کہ ہندؤوں کو دی جانے والی ایک لاکھ اسکیم میں اقلیتوں کو شامل کرنے کی وزیر اعلیٰ چندر شیکھر راؤ نے ہدایت دی ہے۔ جلد ہی اس اسکیم پر عمل آوری ہوگی۔ حیدرآباد کے جل وہار میں اقلیتی قائدین کا اجلاس منعقد ہوا۔ وزیر داخلہ محمود علی کے ساتھ مختلف اقلیتی کارپوریشنوں کے چیرمین کو تہنیت پیش کی گئی۔ اس موقعے پر ہریش راؤ نے کہا کہ وزیراعلیٰ چندر شیکھر راؤ اقلیتوں کا بہت احترام کرتے ہیں اور کہا کہ محمود علی کو دو میعاد کے لیے وزیر بنایا گیا۔
انہوں نے کہا کہ شادی مبارک کو اقلیتوں کے لیے بھی اسکیم لائی گئی جس طرح کلیان لکشمی ہندوؤں کے لیے لائی گئی۔ ریاست میں رہنے والے تمام مذاہب کی ترقی کے لئے یکساں مواقع دینے کی کوشش کی جا رہی ہے۔ ہر شخص کو ترقی حاصل کرنے کا موقع ملے گا۔ اس کے لئے ریاستی حکومت اپنے عہد کی پابند ہے۔
