مارگادرشی چٹ فنڈ پرائیویٹ لمیٹیڈ نے کمپنی پر اعتماد رکھنے والے صارفین کا شکریہ ادا کیا اور انہیں یہ یقین دلایا کہ کمپنی کی جانب سے انکم ٹیکس کی کسی بھی دفعات کی خلاف ورزی نہیں کی گئی اور وہ ریزرو بینک آف انڈیا کی جانب سے جاری کردہ تمام رہنمایانہ خطوط پر عمل پیرا ہے۔
آندھرا پردیش کرائم انویسٹی گیشن ڈپارٹمنٹ (AP-CID) کی جانب سے تازہ نوٹس بھیجے جانے پر کمپنی نے سخت تنقید کرتے ہوئے کہا کہ نوٹس کے تمام دعوے من گھڑت اور جھوٹ پر مبنی ہیں۔ کمپنی نے کہا کہ نوٹس کا مقصد صرف اور صرف ہراساں کرنا ہے جبکہ کمپنی اپنے چٹ فنڈ کے کاروبار کو ریگولیٹری فریم ورک کے تحت مقرر کردہ قواعد و ضوابط کے مطابق اچھے انداز میں چلارہی ہے۔
کمپنی کی جانب سے جاری ایک ایک بیان میں کہا گیا کہ ’ہمارا مالیاتی نظم و ضبط ہماری طاقت ہے اور ہم کسی بھی حال میں قواعد کی خلاف ورزی کی کوئی بھی گنجائش نہیں چھوڑتے‘۔ بیان میں یہ بھی الزام عائد کیا کہ آندھرا پردیش سی آئی ڈی کی جانب سے کی جارہی پوچھ تاچھ بدنیتی پر مبنی ہے اور مارگادرشی کے کاروبار و صارفین کے نیٹ ورک کو نقصان پہنچانے کےلئے ایسا کیا جارہا ہے۔
بیان میں کہا گیا کہ ’ہمارے صارفین کو ہراساں کرنے کے مقصد کے تحت ان کی ذاتی تفصیلات پر اصرار کیا جارہا ہے جس سے ظاہر ہوتا ہے کہ سی آئی ڈی کسٹمر نیٹ ورک کو نقصان پہنچانے کے مذموم ارادوں کے تحت تحقیقات کو جاری رکھے ہوئے ہے۔ یہ بیان آندھرا پردیش CID کی جانب سے کمپنی میں مبینہ مالی بے ضابطگیوں کی تحقیقات کررہی ہے کہ پس منظر میں جاری کیا گیا، جس کا مقصد صارفین کو اس بات سے آگاہ کرانا ہے۔
کمپنی نے بتایا کہ قبل ازیں تلنگانہ ہائیکورٹ کی جانب سے دیئے گئے حکم کے مطابق سی آئی ڈی کو ان کی رازداری میں مداخلت نہیں کرنی چاہئے تھی، معزز عدالت کے حکم کو نظرانداز کرتے ہوئے کی جارہی کاروائی توہین عدالت کے سوا کچھ بھی نہیں ہے۔
معزز عدالت کی ہدایات کے باوجود اے پی سی آئی ڈی کی جانب سے بار بار پریس نوٹس جاری کی جاتی ہیں جس کا واحد مقصد ریاست بھر میں پھیلے تمام صارفین کو ہراساں کرنا اور کمپنی کو بدنام کرنا ہے جو ایک گہری سازش کا نتیجہ معلوم ہوتا ہے۔ کمپنی نے ایک بار پھر کہا کہ اے پی سی آئی ڈی کی جانب سے عائد تمام الزامات من گھڑت اور جھوٹ پر مبنی ہے۔
بیان میں کمپنی نے اپنے صارفین کو شدت سے یہ یقین دلایا ہے کہ مارگادرشی کبھی بھی کسی بھی قسم کی غیرقانونی سرگرمیوں میں ملوث نہیں رہی ہے اور نہ ہی چٹ فنڈ کاروبار سے متعلق قواعد و ضوابط کی کبھی بھی کوئی خلاف ورزی کی گئی ہے۔
