ریاست تلنگانہ کے شہر حیدرآباد کے معزز شخصیت مولانا حسام الدین جعفر پاشاہ کے ساتھ کل افضل گنج پولیس اسٹیشن کے عہدیداروں کی جانب سے ہراساں کرنے کا معاملہ پیش آیا۔
اس واقعے کے بعد حیدرآباد کے لوگوں میں غصہ کی لہر دوڑ گئی، وہیں مولانا کی تائید میں سماجی ، مذہبی و سیاسی رہنماؤں نے برہمی کا اظہار کیا۔
آج مجلس بچاؤ تحریک کے ترجمان امجد اللہ خان نے مولانا جعفر پاشاہ کے مکان پہنچ کر مولانا سے ملاقات کی ۔اس موقع پر انہوں نے کہا کہ پولیس مسلم طبقے کےساتھ سخت رویہ اختیار کر رہی ہے اور مذہبی رہنما مولانا جعفر پاشاہ کے ساتھ جو بد سلوکی کی گئی اس پر مسلم قائدین اور عوام ناراض ہیں۔
انہوں نے مزید کہا کہ سٹی کمشنر پولیس انجنی کمار نے فرنڈلی پولیس کے نام پر عوام کو دھوکہ دیا ہے۔یہ واقعہ کے بعد ابھی تک ریاست کے وزیر داخلہ محمد محمود علی اور سٹی کمشنر پولیس نے مولانا سے ملاقات نہیں کی۔انہوں نے ڈائریکٹر جنرل آف پولیس مہندر ریڈی سے مطالبہ کیا کہ جس عہدیدار نے مولانا کے ساتھ بدسلوکی کی ہے اس پر سخت کارروائی کریں۔
اس موقع پر مولانا جعفر پاشاہ نے عوام سے اپیل کی کہ وہ صبر کے ساتھ رہیں اور کوئی احتجاج نہیں کریں، ساتھ میں انہوں نے امجد اللہ خان کا شکریہ ادا کیا ہے۔
