حیدرآباد: تلنگانہ کی سائبرآباد پولیس بین ریاستی گروہ رام ٹیکری پر پی ڈی ایکٹ لگانے کے اقدامات کررہی ہے۔ یہ گروہ حیدرآباد شہر کے نواح میں ایک بینک اور زیورات کی دکان میں بڑے پیمانے پر ڈکیتی کی منصوبہ بندی کرتے ہوئے حال ہی میں پکڑا گیا تھا۔ جیڈی مٹلہ پولیس نے حکام کو تجاویز روانہ کی ہیں۔ مہاراشٹر اور کرناٹک میں 175 ڈکیتی اور اقدام قتل کے مقدمات میں ملوث پانچ ملزمین نے 11 اپریل کو شہر کے نواحی علاقہ شاہ پور نگر میں ایک بینک اور زیورات کی دکان کو لوٹنے کا منصوبہ بنایا تھا۔ پولیس نے شہر میں ایک نئے گروہ کی آمد کی اطلاع پر ڈکیتی سے ایک دن پہلے ملزمین کو گرفتار کرلیا۔ یہ تمام ملزمین اس وقت چرلہ پلی جیل میں قید ہیں۔ یہ گروہ 2013 سے پڑوسی ریاست میں جرائم کی وارداتوں میں ملوث ہے۔اس کے خلاف کئی مقدمات درج کیے گئے ہیں تاہم تمام ملزمین مفرور تھے۔ مہاراشٹرا پولیس نے اس گروہ کے خلاف ”مہاراشٹر کنٹرول آف آرگنائزڈ کرائم ایکٹ“ لگایا ہے۔
گروہ نے پونے پولیس پر گولی چلائی تھی جو انہیں گرفتار کرنے گئی تھی۔ یہ سب پونے، لونا والا، پمپری اور بدلا پور علاقوں میں شدت سے مطلوب مجرم ہیں۔ جیت پال سنگھ کے خلاف 47، امر سنگھ کے خلاف 18، لکی سنگھ کے خلاف 40، نہال سنگھ کے خلاف 40 اور نشانت کے خلاف 30 مقدمات درج ہیں۔ یہ تمام ڈکیتی، اقدام قتل اور حملہ کے مقدمات ہیں۔ وہیں شہر حیدرآباد کے ایم ایم پہاڑی علاقہ میں پولیس کی جانب سے کمیونٹی میٹنگ اور سائبر بیداری پروگرام منعقد کیا گیا۔ اس پروگرام سے خطاب کرتے ہوئے پولیس عہدیداروں نے کہا کہ پولیس علاقہ کے لا اینڈ آرڈر کے مسائل کے حل کو یقینی بنائے گی۔ ساتھ ہی نوجوانوں کو قانون کو اپنے ہاتھ میں لینے سے باز رہنے کا مشورہ دیا گیا۔ اس موقع پر کہا گیا کہ اگر کوئی پریشان کررہا ہے تو بلاجھجک پولیس سے رجوع ہوں۔ کمشنر پولیس سائبرآباد اورڈی سی پی راجندرنگر کی ہدایت پر یہ پروگرام منعقد کیاگیا۔
یہ بھی پڑھیں: Criminal Gang Busted in Odisha پوری میں جرائم پیشہ گروہ کا پردہ فاش، پانچ گرفتار
یو این آئی
