جگن ضمانت منسوخی معاملہ: 15 ستمبر کو فیصلہ

رگھوراما نے اپنی عرضی میں کہا کہ سی بی آئی نے آمدنی سے زائد اثاثہ جات معاملہ میں جگن کے خلاف 11 چارج شیٹ داخل کیے ہیں۔ انہوں نے الزام لگایا کہ جگن موہن ریڈی وزیراعلی کے طور پر اس معاملہ کے گواہوں پر اثرانداز ہورہے ہیں۔

سی بی آئی کی عدالت نے آندھراپردیش کے وزیراعلی وائی ایس جگن موہن ریڈی کی ضمانت کی منسوخی کےلیے داخل کردہ عرضی کی حتمی سماعت کی اور واضح کیا کہ فیصلے کا اعلان 15 ستمبر کو کیا جائے گا کیونکہ آندھراپردیش کی حکمران جماعت وائی ایس آر کانگریس پارٹی کے رکن پارلیمان وجئے سائی ریڈی کی ضمانت کی منسوخی کے معاملہ پر بحث بدھ کے روز ختم ہوئی ہے۔

عدالت نے کہا کہ 15 ستمبر کو جگن موہن ریڈی اور وجئے سائی ریڈی کی ضمانت کی منسوخی کےلیے داخل کی گئی عرضیوں پر فیصلہ کیا جائے گا۔ وائی ایس آرکانگریس کے باغی رکن پارلیمان رگھوراما کرشنم راجو نے عدالت میں عرضی داخل کرتے ہوئے جگن کی ضمانت کو منسوخ کرنے کی درخواست کی ہے۔ اس عرضی کی میرٹ پر بحث ہوئی۔

رگھوراما نے اپنی عرضی میں کہا کہ سی بی آئی نے آمدنی سے زائد اثاثہ جات معاملہ میں جگن کے خلاف 11چارج شیٹ داخل کیے ہیں۔انہوں نے الزام لگایا کہ جگن موہن ریڈی وزیراعلی کے طورپر اس معاملہ کے گواہوں پر اثرانداز ہورہے ہیں۔انہوں نے اپریل میں یہ عرضی داخل کرتے ہوئے ضمانت کی شرائط کی خلاف ورزی پر جگن کی ضمانت کی منسوخی کی خواہش کی تھی تاہم اس معاملہ میں سی بی آئی نے جواب داخل کرنے سے انکار کردیا اور فیصلہ عدالت کی صوابدید پر چھوڑ دیا۔

اس کے بعد جگن اوررگھوراما کے وکلا کی بحث کی ہی عدالت نے سماعت کی۔اس بحث کی تکمیل 30جولائی کو ہوگئی۔سی بی آئی عدالت نے اسی دن فیصلہ کو محفوظ کردیا تھا اور کہا تھا کہ فیصلہ 25اگست کو سنایاجائے گاتاہم سی بی آئی عدالت نے کہا کہ وہ وجئے سائی ریڈی کی بھی ضمانت کی منسوخی کے لئے دائرکردہ عرضی اور جگن کی ضمانت کی منسوخی کی عرضی دونوں پر اپنا فیصلہ 15ستمبر کو سنائے گی۔

یواین آئی