حال ہی میں حیدرآباد کے ایک شخص نے کورونا کے متعلق عوام میں شعور بیدار کرنے کے لیے کورونا کار کی تخلیق کی تھی۔ اب تین نوجوانوں نے بھی اپنی تخلیق کا مظاہرہ کرتے ہوئے ایک روبوٹ تیار کیا ہے جس کا مقصد آئی سو لیشن وارڈز میں خدمت پر مامور نرسوں کو کورونا کے اثرات سے محفوظ رکھنا ہے۔
آئی ایس ایل انجینئرنگ کالج کے طلباء نے ای ٹی وی بھارت کو اس کے متعلق تفصیلات بتاتے ہوئے کہا کہ کورونا کے واقعات میں ہورہے اضافے کو دیکھتے ہوئے یہ روبوٹ تیار کرنے کا خیال آیا تاکہ زیر علاج متاثرین کے خصوصی وارڈز میں ملازمت کرنے والے طبی عملے کو اس وباء کے اثرات سے محفوظ رکھتے ہوئے متاثرین کی تعداد کو گھٹایا جاسکے۔
محمد اشفاق احمد، مرزا سلمان بیگ اور سید عبدالباری نے بتایا کہ انہوں نے حکومت کو اس روبوٹ کے مشاہدے کے لیے مدعو کیا ہے آئی ٹی سکریٹری جیش رنجن بہت جلد اس روبوٹ کا مشاہدہ کریں گے۔ اگر حکومت کو طلباء کا کام پسند آتا ہے تو ان طلباء کو مزید روبوٹ تیار کرنے کی ذمہ داری دی جائے گی۔
