کورونا وائرس کی مشتبہ علامت پائے جانے پر مشکوک حالت میں سرکردہ سماجی جہدکار سنیتا کرشنن کو شہر حیدرآباد کے گاندھی اسپتال میں داخل کروایا گیا تھا، لیکن جانچ میں ان کی طبی رپورٹس منفی پائی گئی ہے۔
کرشنن جو بنکاک سے واپسی کے بعد ہلکی کھانسی کی علامت کے ساتھ گاندھی اسپتال سے رجوع ہوئی تھیں، ان کے نمونے منگل کو منفی پائے گئے۔
اپنے ٹوئیٹ میں انہوں نے کہاکہ کورونا وائرس کے نتائج ابھی آئے ہیں جو منفی ہیں، اس سے ان کو راحت ملی ہے۔ انہوں نے ان کی بہتر صحت کے لئے نیک تمناوں کا اظہار کرنے والےاپنے تمام دوستوں اور چاہنے والوں کا شکریہ ادا کیا۔
واضح رہے کہ پیر کو تلنگانہ میں کورونا وائرس کے پہلے معاملہ کا پتہ چلا تھا کیونکہ ایک سافٹ وئیر انجینئر جو حال ہی میں دبئی سے ملک واپس آیا تھا اور اس میں کورونا وائرس کی علامت مثبت پائی گئی ہے۔
