دواخانوں میں تیمارداروں کے لیے سحری کا نظم

رمضان المبارک رحمتوں اور برکتوں کا مہینہ ہے، اس ماہ میں کی جانے والی نیکی کا اجر ستر گناہ زیادہ ہوجاتا ہے۔ یہ مہینہ صبر اور غم خواری کے لیے بھی مشہور ہے۔

مسلمان اس ماہ میں اپنا زیادہ تر وقت عبادت و ریاضت میں گزارتے ہیں۔ لیکن گولکنڈہ کے نوجوان اس ماہ میں عوام کی خدمت کرتے ہوئے اجر حاصل کر رہے ہیں، ان کی جانب سے سحر کا اہتمام بہت ہی بہتر انداز میں کیا جا رہا ہے۔ جس کی چہار سوُ ستائش ہو رہی ہے۔

شہر کے مختلف دوا خانوں میں مریضوں کی تیمارداری کرنے والوں کے لیے یہ نوجوان سحری تیار کرتے ہیں اور اپنی نیندوں کو قربان کرکے انہیں روزہ رکھواتے ہیں۔

پہلے رمضان سے یہ کام جاری ہے اور دو عشروں کی تکمیل تک سینکڑوں روزہ داروں تک سحری پہنچائی گئی۔ نوجوانان محلہ کے مطابق دوا خانوں میں تیمارداروں کو سحری کے لیے مسائل کا سامنا کرنا پڑتا ہے جس کے پیش نظر مستحق افراد کو سحری فراہم کرنے کا ارادہ کیا گیا۔