حیدرآباد: بے سہارا افراد کے لیے اولڈ ایج ہوم کی شروعات

تلنگانہ کے دارالحکومت حیدرآباد میں متعدد معمر افراد کی زندگی کے آخری ایام سڑکوں پر گُزر رہے ہیں یا پھر اولادیں اپنے والدین کو اولڈ ایج ہوم میں چھوڑ کر چلی جا رہی ہیں۔ ایسی صورت حال میں ان کا سہارا اولڈ ایج ہومز بن رہے ہیں۔

سڑکوں پر بے یار و مدد گار پڑے رہنے والے معمر افراد کو پناہ دینے اور ان کی دیکھ بھال کے لیے حیدرآباد کے سن سٹی علاقہ میں ہیومن کائنڈ ویلفیئر فاؤنڈیشن کے نام سے ایک اولڈ ایج ہوم شروع کیا گیا ہے۔

فاؤنڈیشن کی صدر عائشہ تحسین نے کہا کہ 'اس اولڈ ایج ہوم میں 60 لوگوں کے رہنے کی گنجائش ہے اور یہاں ہر طرح سے ان کی دیکھ بھال کی جائے گی تاکہ ان بے سہارا افراد کو کسی بھی قسم کی تکلیف نہ ہو۔

انہوں نے کہا کہ اس اولڈ ایج ہوم میں مرد و خواتین کے لیے علیٰحدہ سیکشن بنے ہوئے ہیں۔