اس سال کورونا وائرس کی وجہ سے عاشور خانوں میں عوام کی تعداد میں کافی حد تک کمی واقع ہوئی ہے۔ عاشور خانوں کے ذمہ داروں نے سرکاری ہدایات پر عمل آوری کرتے ہوئے زائرین کو ہدایات پر عمل لازمی قرار دیا ہے۔
کمسن بچوں اور عمر رسیدہ افراد کو زیارت کےلیے نہ آنے کی اپیل کی گئی ہے اس سلسلے میں تشہیر بھی کی جارہی ہے۔
حیدرآباد کے معروف عاشور خانے بی بی کا علاوا کے نگران کار علی الدین آصف نے انتظامات کی تفصیلات بتائیں اور کہا کہ عاشور خانے میں بنا ماسک لگائے داخلہ منع ہے، زائرین کی اسکریننگ کی جارہی ہے، باب الداخلے پر خودکار سنیٹائزر نصب کیا گیا ہے اور شخصی فاصلے کو یقینی بنانے کےلیے والینٹرز کی خدمات حاصل کی گیئں ہیں۔
انہوں نے کہا کہ عاشورہ کے روز بی بی کا علم ہاتھی پر نکالے جانے کا قدیم رواج ہے لیکن اس سال کورونا کے باعث اس رواج کے تعلق سے تجسس برقرار ہے۔ حکومت کی ہدایات پر عمل کرتے ہوئے جلوس نکالا جائے گا۔
