قلب شہر میں واقع اس عمارت میں تعمیر کردہ خاص مینار کلاک ٹاور کے لیے بنایا گیا تھا جس کے چاروں طرف لندن سے منگوائی گئی پانچ فٹ کی چار گھڑیاں نصب کی گئی تھیں جو دور سے بھی نظر آتی تھیں اور اس کے گھنٹے بجنے کی آواز بھی کافی دور تک سنائی دیتی تھی۔
وقت کے ساتھ یہ گھڑیاں بھی قدیم ہوگئیں اور ان کی مرمت کے لیے مشکلات در پیش ہونے لگیں۔ گریٹر حیدرآباد میونسپل کارپوریشن نے اس عمارت کی تزئین کا بیڑہ اٹھایا ہے اور چار برس سے اس کے تزئین کام جاری ہیں۔ تزئین کے ساتھ جی ایچ ایم سی نے گھڑیوں کی تبدیلی کا فیصلہ کیا ہے۔
اب کلاک ٹاور کی پرانی گھڑیوں کو نئی ٹکنالوجی کی گھڑیاں میں تبدیل کردیا جائے گا۔ اس کی ذمہ داری شہر کے قدیم گھڑی ساز کمپنی رمیش واچ کو سونپی گئی، چھے مہینے قبل مذکورہ کمپنی کو تجربے کے طور پر ایک گھڑی نصب کرنے کو کہا گیا تھا تاہم بہترین کارکردگی کے پیش نظر مزید تین گھڑیاں نصب کرنے کا آرڈر دیا گیا۔
