ریاست تلنگانہ میں کورونا وائرس کا قہر مسلسل جاری ہے ہر روز نئے معاملے میں اضافہ ہو رہا ہے، ریاست میں گاندھی ہسپتال واحد ہسپتال ہے جہاں کورونا وائرس کا علاج کیا جارہا ہے لیکن ہسپتال میں جگہ کی تنگی اور عملے کی قلت کے باعث عوام کو اسپتال میں علاج کے لئے داخلے میں دشواریوں کا سامنا کرنا پڑ رہا ہے۔
حکومت نے نجی اسپتالوں میں کورونا کی جانچ و تشخیص کی اجازت دی ہے لیکن اس کے اخراجات عوام کی دسترس سے باہر ہیں ایسے میں یونانی طرز علاج کورونا متاثرین کے لئے مفید ثابت ہوا ہے جس کے ذریعے کورونا کے مثبت مریضوں کو محض چار تا پانچ روز میں راحت ملی ہے۔
ڈاکٹر ایم اے وحید نے واضح کیا کہ یہ صرف ایک یونانی نسخہ ہے جو انہوں نے عوام کی تکلیف کو دیکھتے ہوئے اپنے تجربے سے تیار کیا ہے اور عوام کو اس سے فائدہ ہوا ہے۔
کورونا سے متاثر افراد کے اہل خانہ نے ای ٹی وی بھارت سے بات کرتے ہوئے ان نسخوں کے استعمال سے ہونے والے فوائد کے بارے میں بتایا اور عوام سے اپیل کی کہ وہ اس مشکل وقت میں مہنگے اسپتال جانے کے بجائے گھر پر ہی ان نسخوں کو استعمال کرکے کورونا سے لڑ سکتے ہیں۔
