تلنگانہ پبلک ہیلتھ اینڈ فیملی ویلفیئر کے ڈائرکٹر ڈاکٹر سرینواس راؤ نے کہا کہ ریاست میں کورونا کی صورتحال قابو میں ہے جبکہ انہوں نے جی ایچ ایم سی انتخابات میں مہم چلانے والے رہنماؤں، نمائندے اور کارکنوں کو ایک ہفتہ کےلیے کورنٹائن میں جانے کا مشورہ دیا۔
ڈاکٹر سرینواس راؤ نے کہا کہ ’اگرچہ کہ تلنگانہ میں کورونا کے سب سے کم فعال کیسز ہیں، اموات کی شرح انتہائی کم جبکہ صحتیابی کی شرح اچھی ہے لیکن درجہ حرارت میں کمی اور انتخابات کے دوران ہجوم کا ایک مقام پر جمع ہونا تشویش کی بات ہے۔ انہوں نے تمام سیاسی کارکنوں کو ایک ہفتہ کےلیے تنہا رہنے کا مشورہ دیا۔
انہوں نے سیاسی کارکنوں کو کسی بھی علامت ظاہر ہونے پر بغیر کسی تاخیر کے قریبی پرائمری ہیلتھ کیر سنٹر یا ہسپتال سے رجوع ہونے کا مشورہ بھی دیا۔
واضح رہے کہ تلنگانہ میں ابھی تک 55 لاکھ 51 ہزار 620 ٹسٹ کئے گئے اور 2 لاکھ 70 ہزار 883 کیسز درج کئے گئے جبکہ فی الحال صرف 9 ہزار 266 ایکٹیو کیسز ہیں۔ ریاست میں صحتیابی کی شرح 96.03 فیصد ہے۔
