ہر سال گنیش کا جلوس حیدرآباد میں بڑے پیمانہ پر نکالا جاتا ہے لیکن اس سال کورونا وبا کی وجہ سے جلوس کا اہتمام نہ کرنے کا فیصلہ کیا گیا۔
تلنگانہ ریاست میں گنیش تہوار بڑے عقیدت و احترام سے منایا جاتا ہے جبکہ حیدرآباد میں بالا پور سے جلوس نکالا جاتا ہے جو چندرائن گٹہ، علی آباد، چارمینار، افضل گنج، معظم جاہی مارکٹ، عابڈس اور لبرٹی چوراہے سے ہوتا ہوا ٹینک بینڈ پہنچتا ہے جہاں حسین ساگر میں مورتیوں کا وسرجن کیا جاتا ہے۔
حیدرآباد میں پہلی بار 1980 میں گنیش جلوس کا اہتمام کیا گیا تھا۔ بھاگیہ نگر گنیش اتسو سمیتی نے اپنے بیان میں بتایا کہ اس سال گنیش کا مرکزی جلوس نہیں نکالا جائے گا۔ 22 اگست سے گنیش فیسٹیول کا آغاز ہوگا جو یکم ستمبر تک جاری رہے گا۔
سمیتی نے پنڈال منتظمین سے اپیل کی کہ وہ غریب کے تالابوں میں ہی مورتیوں کا وسرجن انجام دیں اور فیسٹیول کے دوران بھگتوں کی درمیان سماجی فاصلہ کو یقینی بنائیں، ماسک اور سنیٹائزر کے استعمال کو لازمی قرار دیں۔ سمیتی نے پنڈال منتظمین کو بڑی مورتی نہ بیٹھانے کا بھی مشورہ دیا۔
بیان میں مزید کہا گیا کہ ’تمام پنڈالوں منتظمین لازمی طور پر مرکزی اور ریاستی حکومتوں کی جانب سے جاری کردہ رہنمایانہ خطوط پر عمل آوری کو یقینی بنائیں۔ سمیتی کے سکریٹری آر ششی دھر نے کہا کہ جلوس میں سماجی فاصلہ کو یقینی بنانے کےلیے صرف 4 تا 5 افراد ہی شامل رہیں گے۔
