ریاست تلنگانہ کے حیدرآباد میں اینٹی کرپشن ڈے کے موقع پر آر ٹی آئی کے سابق کمشنر ڈاکٹر وینکٹیشورلو نے کہا ہے کہ 'سوال کرنا رشوت خوری کے خاتمہ کا بہترین طریقہ کار ہے'۔
انہوں نے اس موقع پر یوتھ فار اینٹی کرپشن کی جانب سے منعقدہ واک اگینسٹ کرپشن پروگرام سے خطاب کرتے ہوئے کہا کہ 'ملک اُس وقت ترقی کرسکتا ہے جب نوجوان آگے آتے ہوئے رشوت خوری کے خاتمہ کے لئے سوال کریں گے۔'
انہوں نے کہا کہ 'آج کے نوجوانوں کو رشوت خوری کے خاتمہ کیلئے پُرامن تحریک چلانی چاہئے۔'
انہوں نے کہا کہ 'گذشتہ چند سال سے اس تنظیم کی جانب سے سماج میں تبدیلی اور رشوت خوری کے خاتمہ کیلئے انوکھے پروگراموں کے ذریعہ نوجوانوں کو جمع کیا جارہا ہے۔ ان کو سرکاری اسکیمات کے تعلق سے بیداری کے ذریعہ اس بات کو یقینی بنانا چاہئے کہ حقیقی استفادہ کنندگان عوام ہیں۔
آر ٹی آئی کے سابق کمشنر نے کہا کہ 'ہر کسی کو چاہئے کہ وہ سماج کی بہتری کے لئے کام کرے اور ایسی تنظیم کا تعاون کرے۔'
یہ بھی پڑھیں: حکومت کی تحریری تجاویز کے باوجود کسان احتجاج پر بضد
انہوں نے کہا کہ 'رشوت خوری کے خاتمہ میں قانون حق معلومات نے اہم رول ادا کیا اور ہر کسی کو چاہئے کہ وہ اس کا فائدہ اٹھائے۔'
