دریائے کرشنا میں سیلابی پانی کی سطح میں بتدریج کمی ہوتی جارہی ہے۔ جبکہ اضلاع کرشنا اور گنٹور میں بیشترمواضعات اور رہائشی علاقے ہنوز سیلابی پانی میں ہیں اور ہزاروں ایکڑ پر پھیلی فصلیں پانی میں محصور ہیں۔
پرکاشم بیراج جس میں پُلی چنتلہ پروجیکٹ سے 5.99لاکھ کیوزک پانی کا بہاو دیکھاگیا، 70 دروازے کھولتے ہوئے پانی کو سمندر میں چھوڑا گیا۔ عہدیداروں نے کہا کہ تاحال 578 ٹی ایم سی پانی کو پرکاشم بیراج سے سمندر میں چھوڑا گیا۔
بھوپیش گپتانگر، گاندھی کالونی اور رام دیونگر میں کئی رہائشی کالونیاں پانی میں محصور ہوگئی ہیں۔ عہدیداروں نے کہا کہ کرشنا ضلع کے 20 مواضعات میں بھی پانی آگیا جس کے بعد 1200 متاثرین کو بازآبادکاری کے مرکز منتقل کیا گیا۔
ابتدائی تخمینہ کے مطابق ضلع کرشنا میں 3500 ہیکڑز پر پھیلی فصلوں کو نقصان پہنچا۔ سرکاری ذرائع نے کہا کہ ضلع گنٹور میں 9200 سے زائد ایکڑ اراضی کی فصلیں تباہ ہوگئیں۔
