ریاست تلنگانہ کے شہر حیدرآباد کے نواحی علاقے شاد نگر میں میں حالیہ دنوں میں پیش آئے وٹرنری ڈاکٹر پرینکا ریڈی سے ریپ اور قتل کے گھناؤنے اور رونگٹے کھڑے کرنے والے المناک واقعہ پر امیر حلقہ جماعت اسلامی ہند نے گہری تشویش کا اظہار کیا۔
تلنگانہ مولانا حامد محمد خان نے رنج و غم کا اظہار کر تے ہوئے حکومت تلنگانہ، انتظامیہ اور محکمہ پولیس سے درخواست کی ہے کہ وہ اس طرح کے سنگین واقعات کا فوری نوٹ لیتے ہوئے سخت اقدامات کریں اور خاطیوں کو سخت سزا دی جائے۔
امیر حلقہ جماعت اسلامی ہند تلنگانہ مولانا حامد محمد خان نے ذمہ داران جماعت اسلامی محمد اظہر الدین، سیکریٹری رابطہ عامہ، تاج احمد، محمد صدیق، مختار احمد خان، قدرت اللہ و دیگر کے ہمراہ شاد نگر میں قتل کا شکار ہونے والی وٹرنری ڈاکٹر کے گھر پہنچ کر ان کے اہل خانہ سے مل کر پرسہ دیا اور غمزدہ ارکان خاندان کے ساتھ اظہار ہمدردی کیا۔
امیر حلقہ نے کہا کہ اس طرح کے واقعات ریاست میں خواتین کے تحفظ کو لے کر سوالیہ نشان کھڑا کرتے ہیں۔
انہوں نے ان واقعات میں ملوث افراد پر فاسٹ ٹریک کورٹ میں مقدمہ چلاتے ہوئے سخت سے سخت سزا دینے کا مطالبہ کیا تا کہ دوسروں کو عبرت حاصل ہوسکے اور مستقبل میں اس طرح کے واقعات پر روک لگائی جاسکے۔
امیر حلقہ نے کہا کہ اس طرح کے واقعات کو روکنے کے لیے ہی اسلام نے سخت سزائیں تجویز کی ہیں۔
اس موقع پر انہوں نے میڈیا کے بعض گوشوں میں واقعہ کو فرقہ وارانہ رنگ دینے پر سخت نکتہ چینی کی اور کہا کہ جرم کرنے والا مجرم ہیں، چاہے وہ کسی بھی مذہب سے تعلق رکھنے والا ہو۔
انہوں نے کہا کہ اسواقعہ کے بعد بعض ذرائع ابلاغ میں ناموں کے اظہار سے ایک خاص فرقہ کے خلاف ماحول بنانے کا موقع فراہم ہو گیا اور فرقہ پرست عناصر نے اس کو اپنی نفرت پرمبنی سیاست کرنے کا ذریعہ بنالیا۔
انہوں نے مزید میڈیا سے درخواست کی ہے کہ وہ اس طرح کے حساس معاملات میں دانشمند ی کا ثبوت دیتے ہوئے صحیح انداز سے واقعہ کی رپورٹنگ کریں تا کہ موقع پرست عناصر کو اس طرح کے واقعات پر سیاست کرنے کا موقع نہ ملے۔
