تلنگانہ کے وزیر اعلیٰ کے سی آر نے اعلیٰ عہدیداروں کو ہدایت دی ہے کہ دھرانی پورٹل کےلیے ضروری سافٹ ویئر، ہارڈویئر اور دیگر ساز و سامان کا انتظام جلدازجلد کیا جائے جبکہ وزیراعلیٰ نے دسہرہ سے اراضیات اور مکانات کے رجسٹریشن کے عمل کو بحال کرنے کا اعلان کیا ہے۔
اطلاعات کے مطابق دسہرہ کے روز دھرانی پورٹل کا افتتاح کیا جائے گا، جس کے بعد ریاست بھر میں رجسٹریشن کے عمل کا دوبارہ آغاز ہوگا جسے جاریہ ماہ کے اوائل میں اچانک روک دیا گیا تھا۔
وزیراعلیٰ کے مطابق پورٹل کے افتتاح سے قبل ریاست بھر میں سروے نمبرات کے لحاظ سے رجسٹریشن قیمتوں کا تعین کیا جائے گا اور انہیں قیمتوں کی بنیاد پر رجسٹریشن کیا جائے گا۔ کے سی آر نے عہدیدراوں کو مشورہ دیا کہ وہ دسہرہ سے قبل تمام اقسام کی جائیدادوں سے متعلق ڈاٹا کو دھرانی پورٹل میں اپ لوڈ کریں تاکہ آئندہ رجسٹریشن کے عمل کے ساتھ ہی پورٹل پر نئی جائیداوں کی تفصیلات بھی درج ہوتی رہیں گی۔
دسہرہ سے قبل تحصیلدار، نائب تحصیلدار، سب رجسٹرار کو ضرورت کے مطابق تربیت دی جائے گی جبکہ ہر منڈل اور ہر سب رجسٹرار اُفس میں ایک کمپیوٹر آپریٹر کا تقرر کیا جائے گا۔
