حیدرآباد: ٹائمز ناؤ چینل پر بی جے پی ترجمان نپور شرما کی جانب سے شانِ رسالت ماب صلی اللہ علیہ و سلم و ام المومنین حضرت عائشہ صدیقہ رضی اللہ تعالیٰ عنہا کی شان میں گستاخی اور واقعۂ معراج کے تعلق سے بدزبانی ودریدہ دہنی کے خلاف مجلس کے جنرل سکریٹری و رکن اسمبلی یاقوت پورہ سید احمد پاشاہ قادری نے علماء ومشائخین عظام اور دانشوران کے ہمراہ سٹی پولیس کمشنر حیدرآباد سی وی آنند آئی پی ایس سے کمشنر آفس بشیر باغ میں ملاقات کرتے ہوئے شکایت کی اور تفصیلات بتائیں۔ سٹی کمشنر پولیس نے وفد کو تیقن دیا کہ شکایت کا بغور جائزہ لیتے ہوئے سخت کارروائی کی جائے گی۔ مجلسی جنرل سکریٹری نے شرپسند خاتون کو فوری گرفتار کرنے کا مطالبہ کیا۔ بعد ازاں میڈیا سے بات کرتے ہوئے انہوں نے کہا کہ ملک میں دن بدن نفرت پر مبنی ایسے واقعات پیش آرہے ہیں تاکہ عوام میں تفرقہ پیدا کیا جاسکے۔ انہوں نے کہا کہ پولیس ایسے ٹی وی چینلس اور نفرت انگیز بیانات دینے والوں کے خلاف سخت کارروائی کرے۔ Demands Stern Action Against Nupur Sharma
یہ بھی پڑھیں:
- 'توہین رسالت ناقابل معافی جرم'
- شانِ رسالت میں گستاخی کے خلاف پرائیویٹ بل خفیہ کیوں؟: مفتی محمد اسماعیل
اس موضوع کے تعلق سے انہوں نے مزید تفصیلات بتائیں۔ اس وفد میں رکن اسمبلی کاروان کوثر محی الدین' مولانا سید شاہ محمد قبول بادشاہ قادری شطاری' مولانا حامد محمد خان' ڈاکٹر نثار حسین حیدر آغا' مولانا محمد حسام الدین ثانی جعفر پاشاہ' مولانا اولیا حسینی مرتضیٰ پاشاہ قادری' مولانا آصف عمری' محمد اظہر الدین' ضیاء الدین نیر' اور سید احمد پاشاہ قادری رکن اسمبلی یاقوت پورہ موجود تھے۔
