حیدرآباد: لداخ سرحد پر گزشتہ دنوں چینی افواج نے بھارت کے 20 افواج کو ہلاک کر دیا تھا جس کے پیش نظر آج حیدرآباد میں واقع بیگم بازار کے تاجروں نے اپنے جوانوں کی شہادت کے خلاف احتجاج کے طور پر بازار میں چینی اشیاء کے فروخت پر پابندی کا عہد کیا ہے۔
حیدرآباد کا بیگم بازار ریاست کا ٹھوک بازار ہے جہاں مختلف ممالک کے علاوہ بالخصوص چین سے اشیاء در آمد کی جاتی ہے اور تلنگانہ کے علاوہ آندھرا، مہاراسٹرا اور کرناٹک میں فروخت کیا جاتا ہے۔
اس سلسلے میں حیدرآباد کے جنرل مرچنٹ اسوسی ایشن نے ای ٹی وی بھارت سے گفتگو کرتے ہوئے کہا کہ چین کی جانب سے ہمارے جوانوں کو شہید کئے جانے کا ہمیں بے حد افسوس ہے اس لئے ہم چینی اشیاء کا بائیکاٹ کرتے ہیں۔
اسوسی ایشن کے صدر سری رام ویاس نے بتایا کہ باہمی طور پر تاجروں نے چین کی اشیاء کی فروخت پر پابندی عائد کردی ہے ، تاجر ارجن سنگھ نے کہا کہ چین کو معاشی طور پر کمزور کر کے اس سے بدلہ لیا جا سکتا ہے انہوں نے تمام تاجروں اور عوام سے اپنے طور پر چین کو سبق سکھانے کی بات کہی۔
