تلنگانہ کے وزیر انفارمیشن ٹکنالوجی کے تارک راما راو نے کہا ہے کہ بھارت رتن ڈاکٹربی آرامبیڈکر کا خواب 20ویں صدی میں سماجی انصاف کے ذریعہ دلتوں کو مساوی حقوق کی فراہمی تھا۔
وزیراعلی تلنگانہ کے چندرشیکھرراو نے 21ویں صدی میں معاشی طورپر بااختیار بناتے ہوئے دلتوں کو اونچا اٹھانے کی مساعی کی ہے۔
سوشیل میڈیا کے اہم پلیٹ فارم ٹوئیٹر پر سرگرم تارک راما راو جو وزیراعلی کے چندرشیکھرراو کے فرزند اور حکمران جماعت ٹی آرایس کے کارگذارصدر بھی ہیں،نے دلتوں کو بااختیار بنانے کیلئے ریاست میں آج شروع دلت بندھو اسکیم کے سلسلہ میں یہ ٹوئیٹ کیا۔انہوں نے اس پروگرام کے آغاز پر وزیراعلی کی ستائش کی۔
یہ بھی پڑھیں:'کےسی آر اقلیتوں کودوست بناکردھوکہ دے رہےہیں'
اس پروگرام کے ذریعہ ہر دلت خاندان کو حکومت کی جانب سے تجارت کے لئے دس لاکھ روپئے دیئے جائیں گے جو ناقابل واپسی ہوں گے۔اس اسکیم کے تحت ہر دلت کے کھاتہ میں دس لاکھ روپئے کی رقم جمع کروائی جائے گی۔وزیراعلی نے اس اسکیم کا آغاز آج حضورآباد اسمبلی حلقہ میں منعقدہ ایک تقریب میں کیا۔
تارک راما راو نے اسے وزیراعلی کا ایک اور نئی راہ دکھانے والا پروگرام قراردیا۔انہوں نے اس ٹوئیٹ کے ساتھ اپنے والد کی تصویر کو بھی پوسٹ کیا جس کے پس منظر میں دستور ہند کے معمار ڈاکٹر بی آرامبیڈکر ہیں۔
یواین آئی
