ڈائریکٹر محکمۂ صحت برائے تلنگانہ ڈاکٹر جی سرینواس راؤ نے اس بات کی توثیق کرتے ہوئے کہا کہ ریاست تلنگانہ میں جنوری کے پہلے ہفتہ سے کورونا وائرس کے ٹیکہ کا آغاز کیا جائے گا اور اس سلسلہ میں تربیت فراہم کرنے کا عمل شروع کیا جا چکا ہے۔
انہوں نے بتایا کہ ریاستی حکومت کی جانب سے اب تک جو تفصیلات حاصل کی گئی ہیں، اس کے مطابق ریاست میں استعمال کرنے کے لیے محکمہ صحت تلنگانہ کو 3 کروڑ ٹیکے فراہم کئے جائیں گے جو کہ اسٹاک میں پہنچتے رہیں گے۔
ڈاکٹر جی سرینواس راؤ نے کہا کہ ریاستی حکومت نے محکمہ صحت کے ذریعے جنوری میں کئے جانے والے ان اقدامات کے سلسلہ میں تفصیلات حاصل کی ہیں۔ انہو ں نے بتایا کہ تلنگانہ میں سب سے پہلے ٹیکہ ڈاکٹرز کو دیا جائے گا اور ان کے ساتھ ساتھ طبی عملہ کو کورونا وائرس سے محفوظ رہنے کا ٹیکہ دینے کے اقدامات کئے جائیں گے۔
انہوں نے بتایا کہ ابتداء میں 4 محکمہ جات میں خدمات انجام دینے والے 75 لاکھ ملازمین کو ٹیکہ دینے کی تیاری کر لی گئی ہے اور جنوری کے پہلے ہفتہ سے شروع کی جانے والی اس مہم کے دوران ریاستی محکمہ صحت کے تربیت یافتہ عملہ کی جانب سے ٹیکہ اندازی کی جائے گی۔
ڈاکٹر جی سرینواس نے بتایا کہ ریاست میں ان 4 محکمہ جات کے ملازمین کو ٹیکہ دینے کے بعد ریاستی حکومت کے محکمہ صحت کی جانب سے مراکز رائے دہی کی طرح مراکز قائم کئے جائیں گے اور ان مراکز کے ذریعہ شہریوں کو کورونا وائرس کا ٹیکہ دیا جائے گا۔ انہوں نے ٹیکہ کی تفصیلات سے واقف کرواتے ہوئے کہا کہ کورونا وائرس کے اس ٹیکے کی دوخوراک ہیں اور پہلے ٹیکہ کے 4 ہفتوں کے بعد دوسرا ٹیکہ دیا جائے گا۔
